做嘢聽歌可以提高工作效率？

好多人做嘢嗰陣都鍾意聽住歌嚟做，甚至有人話要聽住歌先做到嘢。其實聽歌係咪真係會幫到大家提高工作效率架呢？有冇科學根據架先？如果係真嘅話，以後就可以攞正牌返工聽歌喇！
刺激分泌多巴胺
有人覺得聽歌先做到嘢，係因為聽音樂可以刺激腦部嘅神經元突觸，增加大腦活動，並促進多巴胺分泌，其將產生「莫扎特效應」，令我哋有好心情之餘，仲會令大腦進入一個活躍嘅狀態，有助人學習、記憶和創造性思維嘅施展，從而提高大腦嘅工作效率。

聽音樂能提高工作效率或許只是表象
雖然上面提到，聽音樂可增加大腦活動，但有幾多人聽住歌做嘢，會在意啲咩「莫扎特效應」啊？我哋之所以覺得聽住歌嚟做嘢更能集中精神，只係因為透過聽歌以排除外界所有聲音嘅干擾。而且，有音樂陪住你工作，可幫助擺脫工作時嘅孤獨感。所以，聽歌做嘢與提高工作效率未必有直接關係，你能專心工作，亦唔一定係音樂嘅作用，只不過係聽歌嗰陣排除咗其他噪音嘅干擾，令我哋更容易集中精神工作。有研究都指出， 76%嘅人聽音樂聽咗20至30分鐘之後，其實都唔記得自己聽咗咩歌，即係話，經過一段長時間後，人會產生感覺適應，大腦對音樂嘅刺激會隨之降低，甚至無反應，呢個時候，我諗你已經完全投入咗喺工作裡面，連自己聽梗咩歌都唔知喇！
不同性別需要不同的音樂節奏
講到聽住歌做嘢咁好，但係點解有啲人都係覺得聽歌會分心，根本集中唔到精神工作呢？德國一家大學嘅一位心理學教授指出，不同音樂對男、女會有所區別：女性血壓偏低，聽一啲節奏較快、較有動感嘅音樂，更能投放精力到工作裡，提高工作效率；男性血壓則較高，適合聽一啲節奏偏慢、較能使人放鬆嘅音樂，有助於平靜心屝，更投入於工作當中。

有些行業不適合工作時聽歌
金融、會計、科學等行業，需進行分析、整合資料和計算等工作，其中需運用到邏輯思維，聽音樂工作或會打斷思路，反會降低工作效率；但對於設計、攝影、創作等行業，聽音樂工作或能幫助刺激靈感。

聽歌要聽對聽住歌嚟做嘢會分心？可能只係因為你聽錯歌啫！當大腦遇上複雜嘅音樂，需增加活動量去加以分析，咁會容易分散我哋嘅注意力。所以，揀啲自己聽開嘅歌嚟聽，或是只由一至兩種樂器所演奏出嚟嘅樂曲，甚至係一啲海浪聲等大自然嘅聲音，就冇咁容易分心，同時可以緩和情緒。

工作前聽音樂可調整情緒
怕工作時聽音樂會分心，不如工作前聽返首？工作前聽15至30分鐘嘅音樂，可幫助大腦分泌腦內啡，即「快樂賀爾蒙」，可有助帶走人嘅負面情緒，同時提升集中力。英國一項研究亦顯示，聆聽音樂能幫助調整情緒，令員工有一個積極嘅態度返工，喺收聽音樂嘅情況下，9成員工嘅工作表現仲有所提升添！

原來聽住歌做嘢真係可以提高工作效率，仲可以令人有心情，以後老細見我哋塞住對耳，就無得話我哋唔認真工作啦！
文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com