【管理哲學】​做腦細要學黑幫大佬


一聲令下,一呼百應!做腦細邊個唔想?唔通真係要好似江湖片裏面嘅大佬,惡形惡相靠嚇先可以?年青人實在太年青了,真正嘅大哥大姐如何拿捏溫度,心裏有數。

先處理心情 再處理事情
幾Chur都唔好心急,呢個世界無嘢真正係急嘅,你唔會見到,一個令人心服口服嘅腦細遇大事手騰腳震,就算佢哋心裏面幾咁震,都唔會俾你睇到,心情起伏不定,又點會做到正確決定?隨時累人累己!至於點樣做到人哋心服口服?遇小事就可以發作,唔一定要靠惡嘅,用自己過往嘅經歷,俾人知道你有幾傳奇,平時可以同你傾計但係唔容易接近你生活,做細嘅慢慢會仰慕你,希望成為好似你咁傳奇嘅人,因為當你處理一啲大事嘅時候夠淡定,平時俾你鬧兩句直頭係袋錢入袋!

進退得宜
做大佬唔係樣樣都要認叻,適時示弱會幫你拉近雙方關係,邊個話你唔精於某些事就係蠢?人係唔會識得哂世上所有事情,話晒你都已經係主管級,要競爭嘅對手唔係自己人,有時要比位啲細嘅做下第一,仲要製造機會比佢哋良性競爭,部屬變強等於你條Team實力更加強大,條數冇理由唔識計嘅。至於部下做錯,你就要第一個走出嚟認,唔係推卸所有責任落啲細度,置身事外,上司勇於承擔,有鑊第一個幫手揹,同甘共苦最令人動容,屬下跟隨你嘅心更加堅定。

重情重義
曾經,有啲主管離開公司會帶手下一齊走,點解會肯跟佢走?除咗外圍因素之外,最主要係你知道,跟住呢個腦細靠得住,佢唔會害你,平時用心教你做人,你嘅事即係我嘅事,平時幾忙都記得顧住你,仲會帶你上位,今日未發達唔緊要,你願意跟從嘅係一個有情有義的將來。

最後,黑道做嘢務實又有效率,因為佢哋帶領嘅係一份心,唔止係一個人,腦細主管們不妨參考呢份內功心法,長久帶一班良才,好過不停換班底,揀啱「自己人」都好重要。

文:金金

更多打工仔分享,追蹤 ECjobsonline 專頁 或 瀏覽 www.ecjobsonline.com

留言


請按此登錄後留言。未成為會員? 立即註冊
    快捷鍵:←
    快捷鍵:→