​去見工HR講嘢原來暗藏玄機？

好多人去見工，都會撩HR講兩句，打聽吓消息：公司文化係點，洗唔洗成日OT，有offer嘅話幾時會通知等等，當然，做得HR梗係唔會咁容易畀你挖到料，講嘢通常都係轉彎抹角，有時甚至會問返你轉頭，剎你一個措手不及，但原來呢啲問題，全部都係別有用意……
1. 幾時返得工？
聽到HR咁問，唔好咁開心住，以為公司實請你，HR之所以會咁問，有可能只係想知道你會唔會為咗新公司，即刻拋棄原來嘅公司，第時你都係咁對公司嘅話，咪即係請咗個負心漢返嚟？但係，就算你唔係在職者，但都同HR講你要處理好一啲私人事先可以返得工，對方都會覺得你將自身嘅需要置於公司利益之上。所以，對離職者嚟講，最好就係答隨時都可以返得工，證明你係一個隨時都準備好自己嘅人。至於在職者，就要視乎你有冇預先同原公司溝通好，清楚好辭職要幾耐通知期先好計劃搵工喇！

2. 點解離職？
見你唔係在職人士，HR基本上都會問你點解上一份工冇再做落去？HR往往會透過呢個問題，來確認求職者於工作崗位的穩定性，以及了解求職者嘅性格和價值觀。可是，呢個問題真係唔係咁容易過到關，答之前份工人工太低？工作壓力太大？與同事和上司唔係好夾？種種答案好似都唔係咁有力，求職者去面試前，最好都係諗返個說服到HR嘅原因先好去見工喇！
3. 點解會揀我哋公司？
好多HR通常都會懶係八卦咁，問你點解會想去佢哋公司度做，呢個問題，唔單止可以知道你對公司嘅熟悉程度，你係透過咩途徑知道佢哋公司請人，仲可以試探到你係咪真心鍾意呢間公司。求職者喺回答呢個問題嘅時候，若能多流露自己對公司嘅熱愛，將你對公司嘅了解都講曬出嚟，證明你事前做咗好多準備工夫，HR實會對你加分。

4. 你嘅expected salary係幾多？
呢個問題真係考起唔少求職者，寫太高又好似太自負，寫太低又好似貶低自己咁。所以話，一個問題就可以KO你，測試你對自己有冇足夠信心，熟唔熟悉個行情等等。唔知expected salary應該填幾多嘅話，尤其是啱啱踏入社會的職場新鮮人，要留意喇！將expected salary填成比相關應聘職位的平均薪資高少少，就一定夠穩陣架喇！
5. 「洗唔洗成日OT？」「睇情況囉！」
HR通常都唔會直接答你問題，「洗唔洗成日OT？」呢啲問題，就更加唔會明講，廢是嚇親人啊嘛！其實如果係想吸引人材嘅，就梗係會話公司唔多OT啦！如果話「睇情況」，應該都冇得日日準時收工架喇！因為所謂嘅「睇情況」，只有兩個可能，就係OT一陣，同OT一晚！

6. 「有offer嘅話會再通知你。」
如果HR姐姐咁同你講嘅話，咁就真係恭喜你喇！睇嚟你都有啲機會！HR會咁樣同你講，都只係想你隨時ready聽電話、收offer，畀定心理準備你，遲啲返新工。倘若對方仲問埋你：「識唔識搭車走啊？」、「廁所係右手邊啊！」，咁應該都係請你架喇！相反，見完工，HR淨係同你講句「bye bye」、「門口喺前面」，意思好明顯啦！即係叫你過主啊！
7. 用電話通知你嚟見工
大部份公司都會係由HR逐個打電話，通知啲人上去見工，點解唔用email？因為透過對答，可以預先知道你係一個點樣嘅人：會唔會打極畀你都係成日飛咗去留言？你講嘢會唔會好冇禮貌？唔該都唔講一聲？問啲問題會唔會好小學雞等等。所以話，HR打嚟叫你去見工，其實已經算係第一round 嘅interview，有啲人就係咁被淘汰咗，自己都唔知。

大家去見工嗰陣，都會想盡辦法同HR打交道，探聽吓口風，HR姐姐見慣世事，講嘢通常都好間接，有時甚至會問返你嘢嚟考你！所以，打探消息之餘，都要小心HR陷阱啊！

文：Noelle


更多打工仔分享，追蹤 ECjobsonline 專頁 或 瀏覽 www.ecjobsonline.com