【交通津貼懶人包】八達通每月交通費逾$400可領補貼 精選

香港衣、食、住、行乜都貴，淨係搭公共交通工具，來回閒閒哋都要洗成廿幾、三十蚊，未計嗰啲日日都要由天水圍大長征出柴灣返工嘅打工仔，或是家住東涌，返學返到去將軍澳嘅學生哥，佢哋啲日常交通費，睇怕都千千聲。不過，政府早前就公佈咗個公共交通費用補貼計劃，每個月透過八達通支付公共交通嘅開支超過 $400嘅話，就可以享有補貼，一齊嚟睇吓有冇你份？
計劃內容
每個月以八達通支付公共交通嘅開支超出 $400，不論年齡或入息水平，都可以獲得公共交通費用補貼。補貼額為超出金額嘅25%，上限為每個月 $300。
e.g. 今個月我嘅交通費用為 $1000，
$1,000 - $400 = $600就是我嘅超出金額，
$600 x 25% = $150 就是我可獲得嘅補貼。

適用範圍
計劃適用於每個月透過八達通支付嘅公共交通開支，包括港鐵、專營巴士、專線小巴、渡輪和電車；以及以任何支付方式購買上述公共交通服務嘅月票/日票之費用。所有的士、紅色小巴和非專營巴士嘅車費，以及以任何支付方式購買嘅港鐵（包括機場快綫）單程票、機場巴士單程票、機場快綫即日來回票，以及購買為遊客提供的車/船票嘅費用，將不獲計算在計劃下的每月公共交通開支以內。

同時，市民仍可繼續受惠於政府及各營辦商所提供的公共交通費用優惠計劃，包括長者優惠、合資格殘疾人士公共交通票價優惠、鼓勵就業交通津貼計劃、學生優惠、港鐵與專線小巴轉乘優惠、機場員工優惠、渡輪月票、港鐵都會票和港鐵月票等等。市民在這些優惠計劃下的交通支出，亦會納入於每月公共交通費用開支嘅計算。

個案1
打工仔家住天水圍，office喺觀塘，每月工作22天，已購買港鐵月票（屯門 – 南昌全月通加強版）。港鐵月票費用：$500
搭乘專線小巴出天水圍港鐵站：單程 $4.9（港鐵與專線小巴轉乘優惠每程 $0.5已計算在內）
月票涵蓋範圍之外嘅港鐵車費：單程 $6.1（使用港鐵月票乘搭連接車程嘅75折優惠已計算在內）
每月公共交通開支（4.9+6.1）x 2 x 22 + 500 = $984
扣除 $400後嘅公共交通開支984–400 = $584
補貼金額584 x 25% = $146
每月實際公共交通開支984–146 = $838（相等於原先交通費用嘅85折）

個案2
家住東涌嘅小學生，學校喺天后，每月上課22天。
港鐵車費：單程 $11.2
每月公共交通開支11.2 x 2 x 22 = $492.8扣除 $400後嘅公共交通開支492.8–400 = $92.8
補貼金額92.8 x 25% = $23.2
每月實際公共交通開支492.8–23.2 = $469.6（相等於原先交通費用嘅95折）

個案3
家住長洲嘅打工仔，寫字樓喺金鐘，每月工作25天，已購買渡輪月票（中環 – 長洲）。
渡輪月票費用：$532
中環往返金鐘嘅電車車費：單程 $2.3
每月公共交通開支2.3 x 2 x 25 + 532 = $647
扣除 $400後嘅公共交通開支647–400 = $247
補貼金額247 x 25% = $61.8
每月實際公共交通開支647–61.8 = $585.2（相等於原先交通費用嘅9折）
個案4
家住深井嘅打工仔，office喺北角，每月工作20天，已購買港鐵都會票。
港鐵都會票費用：$425
搭乘專線小巴出荃灣港鐵站：單程 $6.4
每月公共交通開支6.4 x 2 x 20 + 425 = $681
扣除 $400後嘅公共交通開支681–400 = $281
補貼金額281 x 25% = $70.3
每月實際公共交通開支681–70.3 = $610.7（相等於原先交通費用嘅9折）

領取補貼方法
市民毋須就計劃提出任何申請，只要在每個月嘅指定期間內，透過八達通app，或到指定地點（包括港鐵站、八達通服務站）為計劃專設嘅八達通處理器拍一拍張卡，上一個月嘅公共交通費用補貼，就會自動儲入八達通裡面，領取地點隨後公佈。
領取公共交通費用補貼嘅期限為3個月，例如市民因離港而未能於三月領取二月份嘅公共交通開支補貼，他們仍可於同年五月或之前領取該補貼金額。

查詢方面，市民亦可透過八達通app、專設網頁和顧客服務熱線，查詢每個月嘅公共交通開支總額，以及可獲得嘅補貼金額。

計劃有冇規定一張卡只可以由同一個人持有或使用？補貼金係咪以個人為單位作計算？
計劃適用於不記名和個人八達通，每個月嘅公共交通開支和補貼金額，均是以八達通卡為單位作計算，即例如兩公婆，係可以使用同一張成人八達通，公共交通開支和補貼金額都計算在同一張卡內。

但係，多過1張八達通就唔可以合併計算公共交通開支，每張卡嘅公共交通開支都是獨立計算，以得出按該卡記錄所獲得嘅補貼金額。
雖然計劃要等到立法會財務委員會通過撥款之後先會落實到，但計落都慳到少少，夠你食多一、兩餐飯，尤其是日日都要大長征、轉唔同交通工具先去到目的地嘅小市民，分分鐘可以攞返個95折至82折，咁政府推出呢個計劃，都未嘗唔係一件好事嚟嘅，有得平，好過冇得平啦！

文：Noelle


更多打工仔分享，追蹤 ECjobsonline 專頁 或 瀏覽 www.ecjobsonline.com