化解5大職場尷尬事


職場上預到嘅事真係用盡十隻手指同十隻腳趾都數唔曬,當中有唔少事當下遇到真係唔知點化解—特別係令人大感尷尬既事。為大家集齊5件職場上常見尷尬事,睇下相關既化解方法幫唔幫到你。

1. 唔記得人名
「Hi! My name is Karen. Nice to meet you!」、「我叫Jason。」、「叫我Mandy得喇。」……個個同事都用英文名稱呼,有啲重覆性高,屬於「大路名」;有啲就第一次聽;有啲就……有時呢頭講完,嗰頭已經忘記咗,總之就記唔入腦。雖然介紹過唔記得唔係咁好,但如果係只見過一次,之後唔記得,禮貌咁問返人叫咩名其實唔會有問題。但假如之後又唔記得,仲要兜口兜面撞正要打招呼,咁就以微笑搭救,同佢打聲招呼,之後再問下相熟同事佢個名,然後記實就得喇。倘若開會時要點名討論,加返手勢或者以「同事」稱呼,都可以過關。不過最好就當然係記實人哋個名啦!

2. 被撞破講人是非
好似電視劇咁,真係有人選擇喺廁所或者茶水間呢啲以為冇人嘅公眾地方講人是非,但又咁啱俾其他同事撞破,應該點算好?其實對方係咪真係知道你講梗其他人是非都係一個問題,所以千萬唔好自亂陣腳。到時人哋本來唔知,都變咗知道你原來講人壞話。萬一對方真係聽到你講是非咁就應該私底下同佢講返事件中自己有唔恰當嘅地方,睇下對方願唔願意原諒或者當冇事發生。如果對方唔係內容主角,而本身同你無仇無怨,問題通常好快解決。而當對方係內容主角,除咗道歉,盡量避免之後同佢有所接觸,否則會越來越尷尬。

3. 叮錯飯盒
做咗半日嘢終於放lunch,仲唔即刻叮返個住家飯盒醫肚。咪住!唔小心叮錯人哋個飯盒,但又唔知係邊個嘅,點算好?即刻放入雪櫃就一定會焗臭啲飯,攤凍啲再放入雪櫃扮冇事咁樣又係咪正人君子嘅做法?其實寫返張memo,同人say返sorry,講返幾點錯手叮咗人哋個飯,相信對方都唔會太擺上心。下次睇清楚個飯盒先好放入微波爐喇。

4. 同人撞衫
十個上班族有七個都會上某網購平台買衫,而返到工又著得出街嘅來來去去都係嗰啲款式,撞到正一正真係唔出其。你話同相熟嘅同事撞衫可能冇咩所謂,但如果係唔熟,甚至係關係唔係太好嘅同事或者上司,咁就真係唔知點喇。或者其實人哋都唔係好在意,你咪當冇事發生,做返正常嘅自己,唔需要因為同人撞衫而方寸大亂。

5.去廁所冇廁紙
無論小號定大號,去廁所冇廁紙真係一件悲哀嘅事。有網友曾經就呢個話題喺某討論區發起帖文,當中唔少網民都回應話會徒手解決。如果有帶開手機如廁嘅朋友就話可以message同事幫手;但如果廁所訊號唔好,或者空手去廁所嘅,就真係要等有人入嚟,再請佢哋幫手遞紙喇。
其實只要份人唔好咁大頭蝦同過份猜度人哋點睇,以上五大職場尷尬事係可以避免。

小C
一個喜歡韓國文化,韓文程度只適用於非工作範疇的外向女生。小時候因為玩韓國網上遊戲而被像特別符號般的韓文字吸引著,自此想要學習韓文的種子便埋在心內。直到中三暑假便決定跟朋友到韓語中心學習韓文,但不久後因學業繁重而多番中斷學習韓文。後來上了大學,決心成為交換生到韓國交換一年,希望從中結交更多韓國朋友、深入了解更多韓國文化、學會更多課本以外的韓文。最後如願以償,來到幾乎無香港人知道在哪的大邱,以「偽韓妹、真港女」身份享受著平凡但快樂的交換生活。愛吃血腸和包肉、樂聽慶尚道口音、喜歡濟州的海、推薦慶南或全南旅遊。

更多打工仔分享,追蹤 ECjobsonline 專頁 或 瀏覽 www.ecjobsonline.com


標籤: 網民熱話  打工仔  人力資源  

留言


請按此登錄後留言。未成為會員? 立即註冊
    快捷鍵:←
    快捷鍵:→