【Cover Letter唔可以亂寫】6大求職信常見錯誤

要搵份好工一啲都唔容易，由撰寫CV的技巧、打電話嚟約你見工時應對的言談、到上公司面試時的表現，每一個步驟都充滿學問 ! 至於求職時，千祈唔好以為係email打幾句客套說話人地就會收貨，隨時就係因為你封求職信而最終不獲取錄 ! 計我話搵工一定要有準備，連寫封求職信都馬馬虎虎，人地又點會請你呢？睇下你封求職信有無犯以下嘅常見錯誤啦！

1. 以Dear Sir/Madam做開頭
一封好的求職信最基本都應該有一個具體的稱呼作為開首。搵工時，大部份公司都會在招聘廣告上寫埋聯絡人的名稱和聯絡方法。若然唔好彩無寫到的話，可以嘗試自行上網查下招聘負責人的資料，或以HR Manager人力資源部經理作開頭。
2. 無主題或主題過於簡單
Send email搵工時，大家會在subject嗰欄寫啲咩呢 ? 會留空佢 ? 定就咁寫「應徵」兩隻字 ? 其實每間公司日日收咁多email，若你封email個主題寫得唔楚，人地好容易就會miss咗，或者覺得你欠缺誠意，睇都唔睇架！所以寫Cover Letter時，在email subject 一欄最重要就係簡潔標明所申請的職位和職位編號，呢啲工夫絕對唔可以慳！

3. 附上不專業證件相
平時大家去到邊都鐘意拎部手機出嚟自拍，其中一樣你最估唔到嘅事就係有人會send張自拍照去應徵！求職信最講求的就是誠意，屋企無證件相，千祈唔好求其叫人幫你喺幅牆前面影張半身照，或者拎返十年前讀緊書嗰張學生相！為左表現你嘅誠意同專業態度，男仕不妨着恤衫、set一個整齊企理髮型、女仕就化一個得體的妝容，去影張正經相做Cover Letter嘅個人照片啦！
4. 內容刻板或一式一樣
好多人就係因為唔識打求職信，隨便上網搵sample copy and paste。其實用通用版的Cover Letter無針對性又顯得誠意欠奉，應徵每一份職位嘅Cover Letter都應該有針對嘅寫法，例如寫一啲自己過往經歷或經驗能如何勝任應徵的職位。另外，send出去之前緊記double check，因為有唔少大頭蝦連公司名同申請職位都唔記得改，最後send左份錯到離譜的求職信，到時就恨錯難返喇！

5. 內容冗長
好多人都鐘意在求職信盡講自己有幾叻、讀過咩名校和有咩強項等等，有HR曾經反映收過最長一份CV有超過15頁，但其實負責招聘工作的HR日日都收咁多求職信件，邊有心機時間同你睇咁多野！所以寫求職信最重要係簡而精，簡單介紹自己背景及重點寫出長處，緊記留低聯絡資料，篇幅最好可以在一頁紙內。
6. 附件過大或順序混亂
如果以Email應徵的話，附件檔案建議唔超過2MB，所有文件亦應以PDF形式儲存。如果要一次過send埋CV、推薦信、學歷證明文件、成績表或personal statement，就最好將所有文件擺曬喺一個檔案之後再attach，咁就唔怕send漏文件啦！

有人話睇書檯就會知道嗰個人生活企唔企理 ; 睇手字就知嗰個人有無文彩，計我話睇封Cover Letter就可以知嗰個人做事水平如何 ! 唔少求職者都覺得封求職信寫成點影響不太大，但如果你連一件咁簡單嘅工作都唔肯做好佢，又如何說服人地你請你做事呢？

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/5401/%E3%80%90Cover-Letter%E5%94%94%E5%8F%AF%E4%BB%A5%E4%BA%82%E5%AF%AB%E3%80%916%E5%A4%A7%E6%B1%82%E8%81%B7%E4%BF%A1%E5%B8%B8%E8%A6%8B%E9%8C%AF%E8%AA%A4.html