一年容易Appraisal：教你點寫自我評價

一年容易又嚟到appraisal嘅時候啦！唔少公司係俾員工一個正統嘅表現評價之前，都會先要求佢地填寫一份自我評價（self review）嘅。又或者就算唔係一個全面嘅評價，你個上司阿頭都可能叫你講下自己做過啲咩，有咩係做得好，有咩係做得唔好嘅。你可能會因為咁而覺得不安：唔知道自己要講咩，又或者唔知要寫咩好，又唔識去讚自己，又諗緊應該講幾多。唔洗覺得咁大壓力嘅，今次筆者就搵嚟幾個要點同大家分析一下自我評價啦！
咩係自我評價？
就好似個名話齋，自我評價係一個俾你望翻轉頭，紀錄一下你過去嘅工作表現，去反思點樣去發展你依家嘅角色同埋未來路向。咁點為一個好嘅自我評價呢？一個良好嘅自我評價應該要真誠地承認你嘅優點同埋缺點——而且唔只係指出個缺點，而係要寫得出自己點樣從中學習、改善同埋進步。

點解公司要你做自我評價呢？
無人會比你更加清楚你每日做過啲乜嘢，所以公司會想由你把口聽到你做過嘅嘢。透過監測員工嘅自我評價，HR可以睇到你有冇跟足你嘅工作責任，而且可以睇下有冇咩值得留意嘅地方，亦都可以係同你阿頭對你嘅表現評價之間攞到一個公平嘅取態。HR會想要係你同你阿頭嘅評價之間搵到一致嘅意見。如果阿頭嘅評價同員工嘅自我評價有好嘅出入，咁HR就要認真去睇下。
而你嘅阿頭亦會想透過你嘅自我評價，去了解你嘅成長同發展。如果你個阿頭係有心嘅，你越俾得多資訊，你阿頭越會諗到計仔去協助你。

自我評價點樣幫到你呢？
首先，佢可以幫助你去紀錄你係職場上面嘅成就同埋目標，列晒係同一張紙到一覧無遺。其次，透過評核自己嘅工作表現，你可以係職場上面擁有更多嘅自我了解。當你將自己做過嘅嘢，目標係咩同埋相應嘅行動列晒係張表到，你可以重新用另一個角度睇一睇你份工，同埋俾自己一個真正嘅機會去研究下自己嘅職場生涯規劃。仲有仲有，就可以透過自我評價改變現狀啦。你可能係煩緊同老細嘅相處，或者係分工，又或者係趕死線。你可以透過自我評價，去解釋你自己嘅工作處境，同時間提出問題，等你嘅上頭去解決。
咁點樣寫一個好嘅自我評價呢？
可以諗下以下嘅方法呀：
你目前為止最享受嘅工作係乜嘢？點解？
有乜嘢project最令你引以為傲嘅呢？
你學咗啲乜嘢？
如果俾你改變，你會做過啲乜嘢呀？
你嘅上司阿頭點樣幫過你呀？佢地可以點樣做得好啲？
你有冇俾過上司阿頭或者同事評價過你嘅工作表現，而你係有所共鳴嘅呢？點解？
有冇一啲嚟緊嘅project係你有興趣做架？
你想唔想學習過新嘅技能？如果有，你想學啲咩呀？
你想係邊個方面有多啲建議呀？
若果你覺得好難寫嘅話，不妨先由簡單嘅細項寫起先，更加可以用point form。如果你唔清楚自己做過乜嘢，你可以回顧翻自己嘅日曆，仲有工作清單架。慢慢嚟，一步一步寫啦。
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/3501/%E4%B8%80%E5%B9%B4%E5%AE%B9%E6%98%93Appraisal%EF%BC%9A%E6%95%99%E4%BD%A0%E9%BB%9E%E5%AF%AB%E8%87%AA%E6%88%91%E8%A9%95%E5%83%B9.html