性格內向 如何在職場一展所長？

「性格決定命運」，性格開朗、主動嘅人通常都比較有人緣，職場上易受上司賞識同同事愛戴，發展機會自然比人多。咁性格內向嘅人點算好呢？點樣先可以喺職場上爭取表現呢？其實，無論你係性格內向定係性格外向，都有屬於自己嘅優勢，當你可以充分發揮到內向性格嘅優勢時，同樣都可以提升你嘅職場競爭力。
主動爭取適合自己的工作
每個組織或公司內部都會有唔少需要高度集中同忍耐力嘅工作，而通常性格外向、好動嘅人都會覺得呢一類型嘅工作太悶，唔願意去做。內向又細心嘅你可以嘗試主動去爭取呢一類型嘅任務，因為性格適合嘅關係，你唔單止可以輕鬆愉快咁完成呢項工作，同時仲可以幫其他唔想做呢個工作嘅同事走出困境，一舉兩得！

學習同同事聯誼
當你成為一間公司嘅新人嘅時候，你嘅上司同同事通常都會帶住你去到各個部門了解一下，邀請你一齊食lunch、收工之後或者放假嘅時候一齊玩，聯誼一下。喺呢個時候，只要你唔係真係有重要嘅事要做，就最好唔好拒絕大家嘅好意。當然，新加入嘅時候，你會需要用多一點精力同時間去適應同聯誼，但係當大家熟絡咗之後，工作自然更得心應手！
Take a break!
休息唔係指係坐喺度咩都唔做，去洗手間、出去影印文件或者送檔案嘅路上、落樓下買杯咖啡等等，都可以令你暫時離開工作，叉叉電。性格內向嘅你，比較文靜，唔慣有太多活動，可能會不對每日緊接同排山倒海嘅會議應接不暇。其中一個紓緩壓力嘅方法，就係喺公司附近行一個圈，咁樣可以幫助你放鬆、整理好思路，為下一個會議做好準備。

其實，唔同性格嘅人都可以搵到適合自己嘅工作，唔好因為覺得自己性格比其他人被動就會少發展機會。想提升職場競爭力，就先要搵到自己嘅優勢，並且充分利用呢一個優勢去展現自己嘅才能。

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com
文章來源:https://www.ecjobsonline.com/news/857/%E2%80%8B%E6%80%A7%E6%A0%BC%E5%85%A7%E5%90%91--%E5%A6%82%E4%BD%95%E5%9C%A8%E8%81%B7%E5%A0%B4%E4%B8%80%E5%B1%95%E6%89%80%E9%95%B7%EF%BC%9F.html