【裁員自保術】職場自保5招

今年好多行業「見紅」，裁員新聞幾乎日日有。打工仔一個唔留神，隨時收到大信封，有人事顧問教你５招職場自保秘技，喺老闆面前搶分，淡市洪流下力保飯碗！
第1招：老闆讀心術
好員工被裁機會自然少，但喺每個老闆對「好員工」嘅定義都唔同，有啲要員工「做牛做馬」，最好做足24小時。老闆凡事講求「效率」，要求員工準時做哂嘢放工，唔好浪費公司燈油火蠟。所以要學識睇老闆眉頭眼額，適當時候做適當事，先至「襟撈」。

第2招：叢林法則 強者生存
好多人以為做「Mr. Nice」面面俱圓，唔會樹敵就無咁易比人炒，不過無老闆會因為你人緣好唔炒你。職場如戰場，淡市更加要當自己喺叢林中嘅猛獸，強者生存，懂得突圍而出，要對公司有實際貢獻，先可以贏得人人認同。
第3招：少講是非
公司最忌員工蜚短流長，當公司業績低迷時，員工喺另一邊長嗟短嘆，傳到老闆耳邊，聽到都無名火起，未裁員都即時炒咗你先。如果公司流傳裁員消息，千萬別三五成群、議論紛紛，趁機會幫手安撫同事，人消極、你積極，搏命工作搶分。

第4招：不斷升呢 增加「彈性」
裁員後老闆最擔心份工邊個做，如果你具「彈性功能」，能身兼多職，會計、文書、宣傳、掃地「通殺」，精通多國語言，留低機會自然高。所以平日記得「升呢」，專長越多，被裁機會越低。

第5招：謹慎言行
辦公室耳目眾多，言行固然要謹慎，就連上網、發電郵，都要小心。現代監察系統日新月異，上過嘅網站、甚至打粒字都有跡可尋。以為用手機無事？公司WIFI一樣有機會追蹤到。所以辦公時辦公，唔好掛住玩Facbook、炒股票、睇動新聞，上網搵工更加喺死罪。
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/1428/%E3%80%90%E8%A3%81%E5%93%A1%E8%87%AA%E4%BF%9D%E8%A1%93%E3%80%91%E8%81%B7%E5%A0%B4%E8%87%AA%E4%BF%9D5%E6%8B%9B.html