【殘酷真相】老闆最鐘意邊type員工?



打工仔個個都想成為老闆心腹,一係就落足鞋油擦鞋奉承上司,一係就扮曬leader攞彩搏上位。擦鞋還擦鞋,如果你本身嘅資歷、學識、工作態度等等就已經唔討老闆歡心,其實做幾多野都冇用。與其嘥時間做啲冇結果嘅野,不如花少少時間了解下公司老闆鐘意邊一type嘅員工,對症下藥好過啦!

1. 名校畢業生
話就話人品最重要,但人類都是膚淺的動物,一個哈佛大學畢業生,同一個山卡啦大學畢業生擺喺你面前,好多人都係會偏心個名校畢業生,總係覺得讀名校嘅就特別聰明、做得野,又有face啲,咁又係嘅,請到個天才畢業生番嚟,講比同行聽點都威水啲嘅。

2. 本科生
請人時,大部份老闆都會要求求職者具相關行業的學位資格,例如見銀行工就要係business、finance等學科的畢業生。讀文學嘅走去見保險業,冇相關知識,人地唔想從頭教你,就梗係唔願請你啦!所以大學時讀邊科對將來真係好重要架!不過係咪繼續讀上去,拎埋個master,甚至博士學位就一定有着數啲呢?咁又唔一定,大部份工種,普通一個大學畢業生的資歷已經足夠應付有餘,讀得太多書,老闆可能覺得請你係一種大材小用,反而唔請你添啊!

3. 轉工次數少的人
在愛情上,拍拖次數少啲嘅人,硬係好似專一啲咁 ; 同樣道理,轉工次數少,在同一家公司留左好多年的人,在老闆心目中,都係一種專一忠誠的表現,好感自然就大啲。相反,經常轉工、因為薪水而跳槽的員工,自然就比人一種不安定、對公司欠歸屬感的印象,做老闆嘅好難會對你有好感。

4. 有主見的員工
老闆唔一定要自己話曬事嘅,有時候,員工的意見更重要、更有創意。因此,唔少老闆都欣賞有主見的員工,除左可以推動公司發展,更能夠帶領一班員工前進,幫輕老闆的工作量。乜老闆唔擔心員工太有主見會搶走自己風頭咩?當然唔會啦!試諗下,老闆會鐘意六神無主、咩都盲目服從的員工,定係有主見、勇於表達自己的員工多啲呢?答案呼之欲出啦!

5. 社交圈子廣泛的員工
社交平台多friend子就一定係唔好?咁你就錯喇!老闆就係鐘意多friend的員工,事關社交圈子越廣泛,一切有關公司的傳播和覆蓋率就越大,員工就間接成為左公司與外界的溝通橋樑。有一個活生生的招牌,代公司向其他人賣廣告,老闆多謝你都嚟唔切啦!

6. 有話直說的員工
老闆高高在上,一唔小心講錯野,分分鐘收warning letter,甚至比人炒左都唔知咩事。其實老闆係咪就一定討厭員工講負面嘅說話呢?咁又唔一定啵!有嗰句講嗰句,先顯得你份人客觀、坦誠、唔虛偽。所以,以後有咩想表達,不妨照直同老闆講,唔需要用咩語言偽術去包裝句子,老闆自然會知道你係一個直率、不造作的員工。

人人都話職場如戰場,搏到老闆歡心就算贏,不過又係咪人人都知道老闆鐘意點樣嘅員工呢?其實,有時候老闆請你番嚟,就係因為你就係你。唔需要刻意改變自己,只要努力工作,你都可以成為一位出色的員工架!

💡更多關於打工仔日常分享及資訊,📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/1994/%E3%80%90%E6%AE%98%E9%85%B7%E7%9C%9F%E7%9B%B8%E3%80%91%E8%80%81%E9%97%86%E6%9C%80%E9%90%98%E6%84%8F%E9%82%8Atype%E5%93%A1%E5%B7%A5%EF%BC%9F.html

留言


請按此登錄後留言。未成為會員? 立即註冊
    快捷鍵:←
    快捷鍵:→