【求職你要知】見工面試5大禁忌

越嚟越多僱主都反映，而家唔少八、九十後見工，面試時的表現都十分騎呢，一係就以一身MK打扮見工嚇死你 ; 一係就十問九唔應，更加有人帶埋阿媽一齊殺上公司，今次真係唔方唔印象深刻喇！其實見份工又洗乜搞咁多奇怪野，好似平時同人傾計咁自然得體就已經好OK，但原來在態度、眼神、身體動作和語言表達上都有唔少犯不得的禁忌！你面試時又有冇踩到地雷呢？
1. 態度輕浮或自卑
個個都話人有自信睇落都charm啲！面試時自信表現自己的長處固然係好事，但信心過左龍、自信變左做自大，就一定唔係好事！僱主聽你喺度自吹自擂，講到自己咁勁，公司都請你唔起啦！但過份自卑、缺乏自信都係一個大忌！如果你對自己咁冇信心、信唔過自己，試問公司又點信任你呢 ? 所以面試時盡情表達自己的優勢、讓僱主相信你絕對能夠勝任工作的同時，都要記得存一顆謙卑的心，以認真好學的心態，話比僱主知你好肯學野啊！

2. 眼神游離
而家好多人都唔習慣望住人同對方講野，但望住人地雙眼講野係一種禮貌嚟架！平時幾唔習慣、幾唔舒服都好，見工時主動同面試人員有眼神交流，無論係對方問你問題，定你同對方講野，都唔好閃閃縮縮，亦唔好東張西望，盡量望住人地雙眼表示尊重，絕對可以比到面試人員一個良好的印象。
3. 坐唔定小動作多多
個個人講野時都會有自己嘅小動作或者壞習慣 : 指手劃腳、坐唔定、左望右望、un腳、加助語詞等等，去見工就千祈唔好將呢啲小動作都拎出嚟比面試人員睇喇 ！要記住你而家係一個求職者的身份，你的一舉一動，面試人員都盡收眼底。所以話一個小動作或者壞習慣，都可以影響你的一生！

4. 語速過慢或過快
香港人生活節奏急促係最正常不過的事，但見工對答時呢個習慣就可免則免喇！講野太慢或者緊張到口窒窒，同樣都會令對方聽得辛苦又唔清楚你講乜！其實面試講野唔需要十分精通兩文三語，更加不會要求你下下都出口成文、講咩都要加啲四字成語或者引經據典咁，語速自然、有抑揚頓挫就實冇死。人地問你野一下子反應唔嚟唔緊要，最重要係先諗清楚自己要講咩、組織好句子，再清晰表達出來就可以。
5. 問題或要求過多
而家好多年青人搵工都對工種好有要求，對工作內容和薪金的期望都好高，以致在面試時經常出現年青人揀工，而不是公司僱主揀人的情況。面試時提出多啲有關公司文化的問題當然是好事，但如果下下都針對工作內容太多、太刻板、薪水太低唔乎合期望、一星期要番足六日、日日都要朝九晚六好辛苦等而提出要求或者質疑，只會證明你係一個唔捱得又嬌生慣養的後生仔。啱啱出到嚟社會做野，就預左要由低做起、咩都要捱，年資比你長的前輩都未抗議，你就先在面試時諸多意見，咁就唔好怪人地唔請你喇！

筍工就人人都想做，好自然僱主都會想請個有文有路、大方得體嘅人番嚟幫手。面試時已經做足準備工夫，但點解都係冇回音 ? 咁就要檢討下係咪你的態度、眼神、動作等出賣左你喇！身家、學歷有幾威都好，犯左一個見工小禁忌，人地唔請你，唯有怪自己喇！
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/1601/%E3%80%90%E6%B1%82%E8%81%B7%E4%BD%A0%E8%A6%81%E7%9F%A5%E3%80%91%E8%A6%8B%E5%B7%A5%E9%9D%A2%E8%A9%A65%E5%A4%A7%E7%A6%81%E5%BF%8C.html