第一次入場睇波——拜仁vs巴塞 精選

我咁努力爭取去慕尼黑實習，就係為左——入！安！聯！球！場！睇！波！！！

哈哈，終於俾我等到今日喇！！！XD

琴日去左睇拜仁對巴塞嘅友賽，同時都係我第一次入場睇波，超緊張！4點半左右由市中心出發，唔知係咪太早，都唔係好見有拜仁人，搞到著住波衫嘅我好似好odd咁……之後，去到轉車站，見到成咋紅色嘅人，我就安心晒lu~=v=

好彩早d出發，比賽日+放工時間+地鐵工程，本來1個鐘嘅車程變左兩個鐘，我去到都差唔多開波。
入到場，坐低，睇到個景——嗯，張飛值嘅！

咁快就有人買左葛斯件波衫@@

我深深明白到咩係「主場優勢」。其實重點唔係個「場」，而係d「人」。球迷嘅歡呼聲就算鼓勵唔到自己人，都一定嚇死對隊。

仲有，平時睇波淨係聽到d講波佬讀人名，現場呢？介紹拜仁正選陣容、入球球員和入替球員時，現場嘅主持會讀球員嘅名，球迷就會自動自覺叫出球員嘅姓。主持仲會借觀眾嘅聲音報分添，最搞笑係當主持同大家講Danke（唔該），全場一齊答佢Bitte（唔洗客氣），真係有禮貌。XDDD
下半場文迪蘇傑入波後：
（有d亂拍之嫌……^^"）

始終只係友賽，競爭味道欠奉，場波真係唔好睇（睇巴塞個陣容就知hea啦）。不過，一d都唔悶喎~因為一冇野做d粉絲就會自發性玩人浪，超開心！而且成班人入波一齊彈起，射失左一齊「唉~」，認為球證誤判而一齊叫囂，呢種感覺真係好好。所以，淨係感受個氣氛都抵啦！XD

入場睇波固然開心，遇到好人好事就更開心！=)
小妹一收工衝去安聯球場，咩都冇食，於是趁中場休息買d野咬下。點知喺球場入面買咩都要用佢張ArenaCard（類似八達通），好彩排我後面嘅男士有，咁我就俾現今佢，托佢幫我買。搞掂！
之後，左手拎住薯條，右手拎住杯可樂，走返上看台。點知……實Q哥哥又要我出示門票。正當我搵緊地方放低杯可樂時，坐我隔離嘅叔叔正從看台走落黎，見狀就同實Q哥哥講我就坐佢側邊。又搞掂！
完場時都差唔多9點，但個天仲係咁光……
夕陽好美啊！

這一天都好美啊！