上班下班呢回事 · Week001 變係想話比自己聽我仲有得揀

講東講西呢回事 於 30/06/2019 發表 收藏文章
上班下班呢回事 · Week001 變係想話比自己聽我仲有得揀

每次返一份新工都會有從新開始嘅感覺。有人話返新工就係由一個地獄跳到另一個地獄。呢句說話灰得嚟都幾啱,雖然未必完全正確。既然係咁,點解仲要轉工呢,因為呢句說話唔似人遲早都會死一樣咁肯定咁決絕。唔絕對就有希望,好多時變係想話比自己聽,我仲有得揀。曾經有個黑人教書先生,攞住個「變」字就做咗全世界最強國家嘅總統嘞。可想而知,變係有幾大魔力。

變呢個字好有吸引力好有仙氣,好似變靚啲,變瘦啲咁,好似用支神仙棒搖一搖「叮」一聲就搞掂。中間嘅過程全部都可以唔使理,都幾開心。現實啲睇,轉工呢個決定一旦做咗,原先嘅壓力就隨之而無晒,因為點辛苦都會有個限期,黑暗盡頭就望到曙光啦。返新工開頭係會迷惘啲,不過呢段時間都可以好好享受適應期帶俾你嘅新鮮感。總而言之,由辭工都返新工初期呢段時間都係蜜月期。將來點地獄將來至算啦。

新工另一個有趣嘅地方就係你唔知會遇到啲乜嘢新同事,呢個亦可以擴大啲自己嘅生活圈子,有多啲機會交流,對平淡生活都可以帶嚟多啲衝擊,對我哋呢啲咁被動嘅人嚟講,無疑多咗機會同其他人接觸,咁都係好事嚟嘅。望住鏡入面嘅自己,梳咗條長長嘅髮辮,整齊嘅套裝,自己同自己講 : 「今日係新嘅開始,加油!奸爸嗲!」

「我同你介紹,呢位係Richard,係隔離team嘅PM。」講緊嘢嘅呢個人係我新上司Barbra。

「呢位係我哋新嚟嘅PM,Sophie。」

「Nice to meet you, 多多指教。」呢個同我握緊手嘅男仔一睇就知係好有tastes嘅人,佢套寶藍色西装好啱身,著到成個都好fit好醒目。寶藍色唔係人人都carry到㗎,著得唔好會變咗校服或者制服,佢就著到份貴族氣質出嚟,都幾吸引,係典型受女仔歡迎嗰款。但係喺佢輕輕同我握手嗰陣,我見佢後面好遠有一個人,一個我曾經日日都見住,但係好陌生嘅人。係呢個人將我帶嚟呢度。

如果喜歡我們的文章,請即分享到︰

標籤: 長髮  上班  下班  轉工    奧巴馬  有得揀  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→