上班下班呢回事 · Week003 有啲嘢已經不知不覺咁變咗

講東講西呢回事 於 25/07/2019 發表 收藏文章

上班下班呢回事 · Week003 有啲嘢已經不知不覺咁變咗

嗰日之後,經常喺車站都會碰見佢。有時佢會排前啲,有時佢又會排後啲。不過好多時都會上同一架車。佢好似唔係好認到我,但我就留意佢多咗。佢嘅衣著好單纯,恤衫西褲配波鞋,衫褲嘅款式幾乎日日都一樣都幾悶,唯有對波鞋。起初,我剩係知道佢有好多對唔同款嘅波鞋; 後嚟我慢慢發覺到,除咗唔同款之外,原來同一款鞋佢仲會有其他唔同色嘅款,好次佢嗰對白色黑邊波鞋,原來仲有白色白邊,白色藍邊,白色紅邊,黑色黑邊…… 數下數下我諗佢起碼有廿幾對波鞋。唔知點解,我開始知道佢啲波鞋原來都唔平,要千幾二千蚊一對,仲係嚟自美國一個好出名嘅籃球明星出嘅一個叫AJ系列嘅波鞋。睇下睇下,我開始講得出佢對鞋嘅series number。就係咁每日都可以估下佢會著邊對AJ,令重重覆覆嘅上班生活不單只變得無咁乏味,直情變得好期待。

就係咁日日如是,不知不覺之間我都覺得嗰對AJ11越睇越靚,我甚至買咗對嚟著,想知道著住呢對鞋係乜嘢感覺。其實,我自己已經分唔到究竟係我想知道自己著住對鞋係乜嘢感覺吖,定係想感受下佢著住對鞋嘅感覺。喺呢一刻,我剩係知道有啲嘢變咗,但我又唔想或者講唔敢去搞清楚究竟係乜嘢唔同咗。

「下一站,創紀……」哎呀,要落車嘞……

如果喜歡我們的文章,請即分享到︰

標籤: AJ11  MJ  不知不覺  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→