上班下班呢回事 · Week010 一分鐘可以係好耐 精選

上班下班呢回事 · Week010 一分鐘可以係好耐
我壓抑住我嘅情緒，唇角輕輕咁向上一彎: 「你想定唔想？」我對眼望住佢對眼……等緊佢嘅回應……等緊呢一個我等咗好耐好耐，比真實時間更耐嘅回應……呢一刻空氣好似停頓咗，所有身邊嘅嘢都變得好漫長，連時間都扭曲晒……腦入面諗返起落雨嗰一日，同埋好多好多日子或相同或不同嘅AJ，同埋自己著住AJ嗰份糾結，好多好多嗰段返工時間嘅光景都浮晒出嚟……

「我以前以為一分鐘好快就會過去，
其實係可以好長嘅。」

我依家開始明白呢句說話嘞。

佢對眼不知所措咁眨兩眨移開咗……
「遲啲話你知。」

講完呢句佢就起身行開咗嘞。我仍然坐喺會議室，氣氛有啲odd但情緒無因為呢句說話而變得更加唔平靜，因為佢不嬲都係咁嘅，開咗個頭，唔識點樣收個尾。就好似佢遮我嗰日咁，全程都好odd，你只可以理解佢，唔可以怪佢。係咪所有宅男都係咁嘅喇，我唔知道。不過，我無辦法討厭呢個平時嘅佢，呢個係佢嘅本質，係佢不知不覺吸引住我嘅本質。

「點呀？」喺Pantry撞到Richard，同平時一樣咁有型。

「乜嘢點呀？」

「同佢呀。」

「邊個佢呀？」
「同佢夾budget嗰個佢呀。」

「哦……」「Ok吖，個draft好快搞掂咗。我哋同意咗將coffee shop 同埋recreation elements， 擺落co-working zone個operation度。個budget其實都無乜點加到。」

「Good! 好有gimmick。點呀？」

「又乜嘢點呀？」佢同平時有啲唔同，無咗嗰份萬人迷嘅帥氣，變得拘緊咗少少，雖然語氣仍然好似好客氣……

「同佢夾唔夾？唔係個個都明佢㗎？」

「無乜嘢吖，做嘢無話夾唔夾，明唔明，最緊要搞得掂。」

「佢做嘢好醒，其他嘢無做嘢咁醒……尤其是同人溝通……佢好多時未必識得簡單直接表達出嚟嘅好多嘢……理解佢呢樣嘢先可以接受到佢……你……你知我講乜啦，自己考慮清楚啦，有乜嘢要幫手就出聲啦。」

「Ok。」佢講完就走咗。佢呢番說話好唔型，好唔似佢。我搞唔清楚佢係用乜嘢身份講呢番說話，同事？朋友？閨蜜？好odd……雖然Richard佢平時對我嘅事都特別留意，但係佢俾唔到其他男同事俾到我嘅感覺，個感覺怪怪地咁。佢似睇住我多個留意我。
不過，Richard好似幫我確認咗佢一啲嘢，佢真係有啲嘢想向我表達。咁，我仲要等幾耐呢……