上班下班呢回事 · Week011 喜歡人不犯法……可我也只能到喜歡為止了……

講東講西呢回事 於 13/10/2019 發表 收藏文章
上班下班呢回事 · Week011 喜歡人不犯法……可我也只能到喜歡為止了……

人點解總係咁麻煩,永遠都唔可以簡簡單單咁將心入面嘅說話講出嚟呢。俾人拒絕係咪真係咁難接受呢?我唔太明,不過,可能好多男仔都有呢啲無謂嘅自尊,佢哋情願犧牲自己同埋自己鍾意嘅人嘅幸福都要守住呢份對佢哋自己嚟講好浪漫嘅痛苦……呢種近乎自虐嘅沈溺可能就係佢哋呢種男人嘅自戀尊嚴。work唔work我唔知,不過至少,佢無俾人拒絕……


唔想俾人拒絕,最好嘅辦法就係先拒絕人。

呢句說話聽落好有智慧,幫咗好多人,令佢哋可以好有型咁唔使去面對一啲嘢。因為呢句說話係出自一個不覊如風嘅故人口中,你根本無可能又或者根本唔想反駁佢。

其實,我咪一樣想做唔開口嗰個,一樣唔想做俾人拒絕嗰個; 我明白,只要一日未俾人拒絕,一日都仲有幻想,一日都仲有希望,盼望……既然我自己都喺咁,咁我又有乜嘢資格話佢呢……

既然自己係一個對感情無勇氣去直接揾答案嘅女仔,又唔想放棄嘅話,剩低可以做嘅就係等待……

既然自己係一個對感情無勇氣去直接揾答案嘅女仔,雖然喜歡人不犯法……可我也只能到喜歡為止了……

喺跟住嘅日子裏面,一切都好似返番去以前咁,雖然我自己知道有啲嘢由嗰句「遲啲話你知」開始就唔同咗。究竟仲要等幾耐呢?但係今次好奇怪,同以前好唔同; 我無以前感覺咁無奈,咁無安全感; 反而有一種比較踏實嘅感覺,有一種比較有盼望嘅感覺; 更奇怪嘅係,我內心充滿茅盾,一方面好希望有嘢發生,另一方面又好享受呢段盼望時期帶嚟嘅陣陣暗爽,希望呢種感覺一點一滴咁累積,由淡淡的一點一滴咁累積,再慢慢的變成濃濃的,淳淳的一直一直咁延續落去……延續落去……就好似永遠都唔會完結一樣,或者呢啲就所謂對永恒嘅追求啦。

四週圍好嘈,好多人,大家都來自唔同嘅過去,但係就為咗共同嘅未來一齊向同一個方向前行。呢一刻,二百萬人之間嘅距離變得越嚟越细,二百萬人就變得好堅定,好堅固,好真實。呢種由二百萬人形成嘅力量就強大到好似可以推動到一切不可能推動嘅嘢,亦可以爭取到一切不可能爭取嘅訴求。今日我著住AJ嚟到呢度,借住呢二百萬人嘅力量,我想我或者可以爭取多一啲自己嘅幸福,唔需要再一路等落去。

就喺我過咗灣仔天橋畫廊入金鐘嘅呢一刹那,我想打電話俾佢……就係呢一刻,電話響咗……

「喂。」係佢……真係佢

「我依家想話你知……」

「乜嘢呀……」佢嗰邊好嘈。

喺電話嘅另一邊同時傳出嚟嘅聲音係「……下台!……下台!」同我身邊聽到嘅聲音係同步嘅。

「你依家喺邊度?」

「啱啱過咗灣仔橋……」

佢停咗一停……

「我想同你一齊,我想同你一齊一路行落去……」
「…………」我嘅等待終於完結咗嘞……

如果喜歡我們的文章,請即分享到︰

標籤: 拒絕  到喜歡為止  自虐  放棄  等待  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→