公司公私呢回事 · Task001 工作係生活嘅一部份,生活係工作嘅一部份

講東講西呢回事 於 28/11/2019 發表 收藏文章

公司公私呢回事 · Task001 工作係生活嘅一部份,生活係工作嘅一部份
曾經有人講過,喺公司嘅時間分分鐘多過喺屋企,見同事多過見屋企人。呢句對我哋呢啲自己一個人住嘅人嚟講真係無得say no。所以,我同啲同事嘅關係畢嬲都好好。有時我覺得喺屋企仲悶過喺公司tim,返到公司人多啲又熱鬧啲。啲同事都會話我當咗公司係屋企,又話我係工作狂咁。咁算唔算係工作狂呢?可以係又可以唔係; 睇你點睇。

我承認返到公司見到啲人會開心啲,我承認對工作唔反感,工作壓力對我似乎又產生唔到咩嘢負面情緒,所以做起嘢上嚟成日都好似好輕鬆咁,佢哋仲話我對工作已經產生咗免疫能力tim,但係我自己對工作就真係無乜唔好嘅感覺。如果咁就係工作狂,咁咪工作狂囉。工作狂呢個term都幾乜嘢,似直綫話緊你,又似曲綫讚緊你; 話佢型,但又唔係好夠瀟灑,有啲硬得滯唔夠型,同我形象唔係好夾。其實工唔工作狂又有乜嘢所謂吖,最好就係返工又咁開心,唔使返工又咁開心。係咪?


其實你諗下,每日起身,換衫,梳洗,出門口,落樓,攞車,揸車,泊車,上樓,返工; 放工就reverse,放工,落樓,攞車,揸車,泊車,上樓,返屋企,換衫,瞓覺。日日如是咁返工工作再工作,當你有100歲命,分分鐘你工作嘅時間佔咗你人生嘅29幾萬小時。無咗工作,你嘅生活就唔見咗29幾萬個鐘,扣除瞓覺嗰幾十萬個鐘,你剩低用嚟生活嘅時間直投係好有限。所以,有人話工作係生活嘅一部分,有時我反而覺得生活係工作嘅一部份似多啲。

反而喺日日都咁上下嘅生活入面,有時工作仲可以帶多啲unexpected俾你,咁先無咁悶呀。嗱,今日又有新刺激嘞。

「我同你介紹,呢位係Richard,係隔離team嘅PM。」講緊嘢嘅呢個人係隔離Team嘅老細Barbra。

「呢位係我哋新嚟嘅PM,Sophie。」

「Nice to meet you, 多多指教。」呢個同我握緊手嘅女仔梳咗條長長嘅髮辮,著住套湖水藍色嘅整齊套裝,好charm。不過,佢雖然係同我握緊手,雙眼係望住我,但係我覺得佢唔係100% focus喺同我打招呼度。好少女仔會咁對我。我覺得呢個新嚟嘅女同事會將呢間公司嘅生態徹徹底底咁改變。

如果喜歡我們的文章,請即分享到︰

標籤: 公私  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→