公司公私呢回事 · Task002 Sync Sync相惜

講東講西呢回事 於 28/01/2020 發表 收藏文章

公司公私呢回事 · Task002 Sync Sync相惜
「喂!老细吹雞呀!」叫埋個同事去聽老細briefing。呢個同事叫阿澤,係杜汶澤個澤。不過,如果你用呢個思維睇呢個人,你輸晒。唔好講話佢無杜汶澤咁搶咁激咁受歡迎,同事對佢嘅印象極之模糊,再講得衰啲直投係睇佢唔到咁滯,好似透明人咁。佢每日都差唔多時間返工放工,每日大部分時間都只係對住個「芒」,唔同人溝通乜滯。當佢全神貫注眼都唔眨咁望住個「芒 」嗰陣,自自然然就將佢身邊嗰幾厘米嘅範圍據為己有,凝成咗一個只有佢自己先享用到嘅空間,製造咗一個無形嘅距離,呢個小小嘅距離令佢覺得好安心好自在,呢個被產生出嚟嘅空間就係佢嘅comfort zone。喺呢個角度嚟睇,啲同事就話佢無改錯名,佢真係好「宅」。佢自製嗰個得嗰幾寸嘅comfort zone,真係好似佢嘅私人住宅咁罩住佢,你都咪話唔搞嘢。

好多人話返工係嚟做嘢嘅,唔係嚟識朋友嘅。呢句用喺佢身上都好恰當。佢成日都無乜聲氣,好鬼悶,連佢啲衣著都係一成不變,呢句「一成不變」真係唔係隨口噏㗎,佢每日都係著到黑白粵語片咁,白色恤衫黑色褲,唯一有唔同嘅就係佢腳上面嗰對波鞋。我留意咗好耐㗎嘞,就算對波鞋都係同一個系列嘅,不過佢真係有好多對唔同款唔同色,所以佢嘅衣著變化比例真係少過一成,計埋對就算差唔多日日唔同嘅波鞋最多都係得5,6個%變化咁上下,真係唔夠一成㗎。不過你估唔到,一個咁一成不變嘅人,做起嘢上嚟就真係成個人唔同晒,有料到得嚟仲好識變通,真係估佢唔到。

佢係負責估Budget嘅,都話明係估價啦,又點會有足夠資料俾你吖!有啲懶醒其實堅係懶嘅粉腸,你問佢攞個budget 嗰幾粒數,又唔係要佢真金白銀拎錢出嚟,佢問返你幾百個問題,喂!單project十劃都未有一撇,起晒做完咗都答唔晒你嗰啲問題啦,仲問咁多托咩。喺呢啲位,阿澤就識得做好多又近磅又reasonable 嘅assumptions, 唔使煩你,一樣出到呢幾粒數。而且佢出嘅呢幾粒數,往往就係你最想要嘅嗰幾粒數,呢幾粒數仲會話返俾你知有乜嘢嘢要修改。嗱!呢啲咪叫做有sense囉。其他同事唔明點解我哋會咁夾,呢啲真係講俾佢哋知佢哋都唔會明。因為有sense嘅人先至可以明白到有sense嘅人,佢哋會明白對方思考嘅方式同埋喺思考當中會提取乜嘢為之有意義嘅嘢。好似以前啲武俠小說咁,只有高手先至會明白高手嘅孤獨。當你遇到呢個明白呢種孤獨嘅人,無論你哋係戰友或者係敵人,都不其然會產生呢種惺惺相惜嘅興奮。喺而家呢個年代,我會話我哋係sync到,即係synchronize到。你明唔明呀?無論你有幾勁幾劃時代嘅思維,但係無人領略到,無人sync到你,就無人appreciate到你有幾堅。就好似你係一個米芝蓮三星嘅厨師,費盡心思創造出一份完美嘅素食餐單,喺你情緒最澎湃最想同人分享嘅時候,企喺你面前嘅全部客人都係食人族族人……因為你間餐廳係開喺食人族……咁就算無論你有幾情緒高漲都會立即謝晒啦……但係,如果喺呢個時候,竟然有個外來遊客入嚟幫襯,佢仲話俾你知佢係vegetarian,問你有乜推介,喺呢一刻,只有呢個人先可以將你嘅價值徹底呈現出嚟?呢個人就係「阿澤」。同我Sync Sync相惜嘅同事。


「好嘞,嗱,俾心機搞好個盤嘞。」

嗱,呢句就係一到lunch老細就做到嗰句最靚嘅ending嘞。對我嚟講,呢句話就係一個新遊戲嘅開始,我嘅腎上線素即刻強力標升,不過同個project就無乜關係……

如果喜歡我們的文章,請即分享到︰

標籤: 惺惺相惜  高手  孤獨  Synchronise  米芝蓮  

留言

會員
我要評論
請按此登錄後留言。未成為會員? 立即註冊
  • Lam Kin Ping
    Lam Kin Ping 於 02/02/2020 評論 NO. 1

    着白恤衫黑色西褲,但會着波鞋?係一個怪人喎,而且仲有唔同波鞋會換?怪上加怪。

  • PMYIFP
    PMYIFP 於 05/02/2020 評論 NO. 2

    係呀,佢衣著上同性格上有好多缺陷㗎。但係呢啲缺陷往往都係來自佢嘅一份堅持

  • PMYIFP
    PMYIFP 於 05/02/2020 評論 NO. 3

    背棄堅持,誰人都可以。那會怕有一天只你共我。

快捷鍵:←
快捷鍵:→