公司公私呢回事 · Task003 乜嘢係靚,乜嘢係正

講東講西呢回事 於 01/03/2020 發表 收藏文章
公司公私呢回事 · Task003 乜嘢係靚,乜嘢係正


「喂,程小姐埋緊你度,拜拜。」

佢帶住嗰種好輕好輕,輕到睇唔出,淨係feel到就已經覺得好nice,令人好舒服嘅笑容,施施然,好似slow motion咁一步一步行緊埋嚟阿澤個位度。見到咁,我講完句說話就行返埋自己個位度。佢迎面而嚟,我對眼同佢打咗個招呼。喺我同佢走得最近嘅時候,一抹令人好舒服嘅淡淡幽香喺佢身上滲緊出嚟……呢個時刻我同佢之間嘅距離係20厘米。

無人會否定程小姐擁有一種好特別嘅吸引力。首先,靚唔靚雖然話就好見仁見智啫,呢啲係講緊心目中嘅靚唔靚,有人覺得劉心悠靚啲,又有人覺得周秀娜靚啲; 嗱,呢啲咪所謂各花入各眼,見仁見智囉。但係,靚其實係有最起碼嘅客觀標準嘅,好似如花咁,相信無乜人會用靚嚟形容佢掛?講緊係星爺嗰個如花呀。呢個睇法其實可以好一致。

而程小姐嗰隻,我相信公司好多男人都會覺得佢幾靚,但我就唔會話佢靚定唔靚,我會話佢 - 正。「正」呢個形容詞好subtle,有好多details但成個字就只得五劃,粗中帶幼,同我個style好夾。程小姐平時都係化nude look makeup,梳一條光潤烏黑嘅長長馬尾,睇上去好開朗,好有親和力。連衫嘅顏色都係恰到好處,湖水藍,淡青粉綠,米黄雪紡,全部都好舒服,好簡約,好隨性。呢啲配搭同佢性格好夾,又或者咁講,要有咁正嘅性格先可以襯到咁正嘅配搭,train都train唔到㗎。taste可以浸,佢呢啲係天份,係gift。

nude look makeup 最強嘅地方就係,唔搶但好順眼。就好似表面上乜都無乜點做,但其實做咗好多好有效嘅groud work; 仲唔覺得佢功高蓋主tim。你話嘞,佢阿姐Barbra又點會唔𡃶住佢吖。

望住佢企喺阿澤個位,隔住個partition輕輕咁向住佢挨前少少。阿澤就眼都唔眨咁望住個茫。就咁樣,包圍喺佢哋兩個嘅時空就凝固咗。時間變到好慢好慢,慢到一個程度足夠我,領會到愛因斯坦相對論的時間伸延。而我雙眼,亦無離開過佢哋……一路咁望住佢哋,四週圍嘅空間就一路擴漲,就好似所有嘢由佢哋嗰度,慢慢向住我呢個方向擴散過嚟,而佢哋兩個就好似身處暗黑嘅舞台中央,比支射燈light up咗一樣…………唔知過咗幾耐,呢個畫面最後由程小姐轉身返埋位而终結,我望一望時間,原來成件事只係過咗分零兩分鐘……

當佢一路行返埋位,我feel到有一刻佢瞄咗我一眼,我亦無迴避到,雖然我無望返住佢,但就回應咗一個好陳冠希嘅笑容比佢。佢知我知大家知,大家喺度做緊乜嘢……
無錯,程小姐就係B Team嘅Sophie。佢成日都鍾意揾住阿澤。其他同事唔明點解,不過,我諗我知佢嘅用意。我話俾阿澤聽,梗係因為佢seven啦。我咁講嘅時候,其實係有啲唔憤氣,有乜理由佢兩個會有啲咁特殊嘅聯系,但就無我份吖。

程小姐嘅出現肯定咗我哋單project會有變數,兩组人會一齊跑,睇下邊组會跑出。睇嚟我哋今次都無可能搣甩呢個對手。不過,要有啲咁有趣嘅對手,成件事先會變得有趣。

「Ric,聽日好出嘢嘞!」

「No problem, this is my job.」

如果喜歡我們的文章,請即分享到︰

標籤:     劉心悠  周秀娜  如花  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→