公司公私呢回事 · Task004 輸嘅管理 ÷笨=精

講東講西呢回事 於 22/03/2020 發表 收藏文章
公司公私呢回事 · Task004 輸嘅管理 ÷笨=精

砌proposal對我嚟講簡直無難度,大方向有咗嘞,諗下點樣豐富下啲details,that’s it,就係咁簡單。不過,嘢就個個都咁做,好似跑步呀,游水呀咁,咪又係人做乜嘢,你做乜嘢。咁始終都有啲人係叻啲,有啲人係無咁叻,功夫好啲嘅,就贏; 功夫唔夠,咪輸囉。曾經有人講個: 功夫,兩個字,一横一直,錯嘅,瞓低囉,企得番喺度嗰個先至係啱晒,係咪咁話呀?

呢番說話聽落好似好啱,無錯,喺黑白世界入面,呢番說話啱晒。因為喺嗰個世界入面,所有嘢唔係黑,就係白; 啱就係啱,錯就係錯; 赢就係贏,輸就係輸。不過,喺我哋生活嘅呢個世界,除咗黑色同白色,亦唔單只仲有灰色,直情係彩色添。現實生活唔同比賽,比賽係有rules去判定乜嘢係贏,乜嘢係輸。但係生活就好唔同,有時贏嘅未必係贏,輸嘅亦未必係輸; 或者,根本就無分贏定係輸; 又或者,根本就唔到你分邊個赢邊個輸。嚟緊呢個project,勝負易分; 輸贏難料……我心中有數…… 咁又點吖?咪又係要做……


對我嚟講,贏唔贏,輸唔輸都好閒,最緊要有得玩,兼且要有好對手陪你玩,咁就最正嘞。如果唔係,你幾叻都無人知,Barbra同程小姐都算係好對手,其實佢哋好清楚知道自己手上有乜嘢牌,亦知道我同阿澤手上揸緊乜嘢牌。四個人就好似玩緊國際橋牌一樣,大家知道晒大家揸乜,勝負亦已經分咗,要做嘅就係令對手發揮唔到自己手上揸住副牌嘅最大作用。橋牌呢個玩意好有趣,好講智慧,當主攻做啱晒嘅時候,防守可以做到嘅嘢唔多但要好到位,可能只係得一次機會,出啱咗,把握到,影響到對手,嬴; 出啱咗,但影響唔到對手,都係輸。所以,最大嘅智慧訊息就係幾時都要有輸嘅準備,點解輸,睇下可唔可以揀點樣輸,再或者睇下輸咗啲乜,可以換到啲乜。呢個mind set係輸嘅管理。同風險管理有啲似,但其實好唔同,風險係對不確定性嘅事情作出應對; 不確定即係可以係赢,亦可以係輸,按赢輸嘅可能性作出適度應對。輸嘅管理係將輸呢個結果充分分析、了解從而作出應對,不單只要減少損失,甚至要從中提煉到利益。我哋有句說話可以將輸嘅管理嘅神髓好精簡好貼地咁闡述出嚟,呢句說話就係 – 除笨有精。不過輸嘅管理就係將除笨有精最利益化。點呀?收唔收到?


贏就好似成班朋友開開心心熱熱鬧鬧玩餐勁威番晚咁,嘘一聲就過咗。輸就會諗嚟諗去,早知呢樣,早知嗰樣,今次點樣,又下次就咁樣,反反覆覆唔多好受。而我對工作從來都乜壓力,可能因為我揀咗同赢做朋友,同輸做知己啦。

「喂,個draft搞掂咗,到你嘞。」

呢句說話唔會剩係得阿澤一個聽到,

又有戲睇……
標籤: 輸贏  除笨有精  輸嘅管理  ÷笨=精  

留言


請按此登錄後留言。未成為會員? 立即註冊
    快捷鍵:←
    快捷鍵:→