公司公私呢回事 · Task006 有啲嘢收收埋埋唔清唔楚無著數

講東講西呢回事 於 07/08/2020 發表 收藏文章
公司公私呢回事 · Task006 有啲嘢收收埋埋唔清唔楚無著數


我哋跟住Ba姐尾做埋個presentation都差唔多食晏嘞。

「我哋公司需要一個地標性嘅項目,亦唔可以過於傳统缺乏新意。呢個project你哋兩team一齊搞。Victor你嗰team take lead; Barbra 你哋team B creative啲喺co-working space 同埋gimmick嘢方面做support,就咁。」講呢番一鎚定音嘅說話嘅呢個,就係公司嘅大老板嘞。

「Richard,咁你哋跟住搞啦。Barbra,又要麻煩你哋嘞,唔該,辛苦哂。」我哋team老细講完呢句「辛苦晒」就急急腳懒忙咁走咗,咪又係趕往放lunch啫。

「你睇唔睇到呀?」我望住阿澤講。

「老细?」

「佢happy就唔使講啦,佢嗰句「辛苦晒」呀?」
「唔?」只有sync到嘅,先可以用最少嘅言語表達最直接嘅意思。

「Ba姐成磈面膠晒呀。」

「老细嗰句直投當正同我哋做完briefing講拜拜咁,咁即係當正team B under佢。呢下入得Ba姐好應,唔膠就有鬼啦。」我知佢知我想講乜,睇佢嗰個無乜表情嘅表情,佢應該担心緊另一樣嘢。呢樣嘢都係我宜家關心緊嘅。

「我都估到大老板玩呢招㗎嘞,益咗你啦。」佢仲未俾到反應。

「喂,開心到講唔到嘢呀?粒聲唔出咁。程小姐奉旨同你夾嘢喎,我都話幫你㗎啦。」出句聲啦。

「未必係佢嘅。」吓!唔係嘛!

「唔係佢,唔通Ba姐自己上咩。呢啖氣隨時單project完咗佢都未消到,佢點會自己落手落腳俾你老細玩吖。年青人,你太年輕嘞。總之做好熱身啦,Ba姐無咁易俾我哋放甩㗎。」我哋同佢哋仲有排玩。

望住阿澤個表情,完全感受唔到赢咗,直投愁到好似輸咗咁。當一個男人失去咗佢應有嘅判斷嘅時候,証明佢領咗嘢,領咗乜嘢?可以係好嘢,亦可以係衰嘢。不過佢喺呢一分鐘,肯定睇唔到Ba姐跟咗大老板入房,剩係睇到程小姐返埋位。我唔想見到佢咁,佢咁樣搞到連我自己都好struggle……佢咁多嘢收收埋埋,唔清唔楚其實真係對大家都無乜著數,幫佢又好,幫自己又好,有啲嘢係時候要行多步,搞清楚佢。

中午老细Victor出咗個meeting request話要做個Joint Team Briefing倾下個新project 啲嘢,擺明係佢想宣示主權嘅棟篤笑表演啦。呢個老細就係咁貪玩,咁虚榮㗎嘞,有時我覺得佢似女人仲多個Ba姐似女人。我拎起電話call程小姐,想同佢倾下聽日個會啲嘢,睇下佢心入面係點諗。


「喂,Sophia?阻唔阻你?」廢問。

「Richard?恭喜你哋攞到個Job喎。我依家OK, 咩嘢事?」廢答。

「無,想睇下你聽日個會O唔OK?」再廢問。

「OK,Ba姐同我都會出席。有乜嘢要我哋呢邊準備?」再廢答。

「無,我諗你哋會唔會集中返啲gimmick嘢就0K㗎啦。」試下你。

「OK,無問題。咁budget方面會預留咗幾多俾我哋搞?」哦?有趣……

「good! 咁你覺得邊啲gimmick嘢係一定要做?邊啲係Optional?」再試下你。

「其實大方向都係會sell co-habitation,揀做到乜就要睇下預咗有幾多budget可以用……」果然係咁……聲綫仍然係咁迷人。

「其實關於你哋嗰part,個budget喺呢一刻仍然係open嘅……啲嘢清楚啲,好似design 或者個development 嘅main theme,個budget就可以firm啲啦。咁Design上仲有乜嘢想了解多啲吖?如果有乜嘢想清晰啲,或者我哋可以面對面倾15分鐘,咁樣可能可以幫到你搞清楚啲嘢,what ll u say?」搞清楚佢……

「唔………………Richard,多謝你先……其實你可以放心,依家你哋個design concept或者你嘅諗法…………我大致都掌握到,反而係個budget仍然存在好多變數,有啲難掌握,呢一刻睇唔通………我諗你明白我講乜……」呢到,佢停咗五秒……


「唔哼……」呢個係我嘅回應……

「我自己嗰part我已經好清楚,content 同budget都ready,只係剩低要搞清楚個大budget……就住佢我先知可以點做……」佢又停咗五秒……

「唔哼……」我都係咁樣回應……

「料喺presentation都見過晒,爭執藥啫。藥方都寫好咗幾張,剩低睇下同個budget夾唔夾到,睇下有幾多錢就可以定執乜嘢藥,well?」

佢係用佢好温柔,好舒服嘅聲音同我講,我聽得明佢嘅意思,我真係聽得明佢嘅意思,亦預咗會係咁,但係,我個心……依然沉一沉……或者,我要再諗一諗,睇下跟著可以點做。呢次輪到我停咗十秒……

「Richard,ok?」

「明白……唔……既然係咁,聽日個會之後,我哋阿Jack會同你夾下commercial 啲嘢,有乜唔清楚嘅就搞清楚佢,ok?」十秒對十秒,大家都無輸到……



「ok! Thx Richard。」我感受唔到謝意,我感受到嘅係來自自己嘅葡萄……

如果喜歡我們的文章,請即分享到︰

標籤: 唔清唔楚  葡萄  收收埋埋  打電話  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→