公司公私呢回事 · Task010 風景?明月?夢?定係你?

講東講西呢回事 於 28/03/2022 發表 收藏文章
公司公私呢回事 · Task010 風景?明月?夢?定係你?
 

「牛什湯粗,凍奶茶。」
 
又係宵夜時間,次次都係呢間,餐餐都係叫呢啲,咁咪就係宅囉。
 
「你悶唔悶㗎,餐餐都係呢幾味?」
 
「你悶唔悶㗎,次次都係呢兩句?」
 
「其實你有無諗過要變下啫?」
 
「都慣咗啦,仲變嚟做乜。」
 
「慣咗?乜你唔係鍾意先餐餐一樣嘅咩?」
 
「邊分得咁清楚吖,與其講鍾意,不如話唔慣一啲自己唔慣嘅嘢啦。試新嘢又要講彩數,啱就話啫,唔啱又無癮又無謂又唔見錢……咁下次呢?又搏呀?衰多次咁又點呢?倒不如揾啲穩陣啲啦。」
 
「可能變下會過癮啲呢?」
 
佢無彩我。
 
「早兩日我同程小姐傾咗幾句…….」
 
我望住佢,佢開始食麵。
 
「我見佢呢排好shine,成個人都正咗好多,就忍唔住讚下佢,順便咪問下佢係咪有咩嘢事發生咗囉。」
 
佢停咗一停。
 
「點知佢好風騷咁話……等緊……睇得出佢唔似好緊張咁,仲好似等得好enjoy tim……」
 
佢又停咗一停。
 
「佢又話有啲以前唔係好清楚嘅嘢,宜家好似清楚咗少少……佢講到呢道,雙眼笑咪咪咁閃下閃下……真係好正……呢一刻嘅程小姐真係好吸引。我諗個個男人見到都會好冧。」
 
佢微微郁一郁個頭,瞄咗我一下。
 
「唔知點解,見到佢越正,我自己就變得越無底。或者係因為我知道……佢越淡定,我至緊嗰個就會離開得我越遠……遠到我永遠都拉唔返佢埋嚟我度……」
 
我望住佢,佢好專注咁耷底個頭,夾住注麵,一啖一啖咁放入口,熱燙燙嘅麵條透出陣陣熱氣,將掛喺佢面上嘅一對鏡片徹底咁霧化咗,成個人無晒表情,剩低嘅只有湯汁同麵條經過佢咀唇流入口腔時發出嘅雪雪聲,呢種雪雪聲以兩拍一嘅beat一次又一次咁響起,雪雪…… 雪雪…… 雪雪…… 呢種不斷嘅重覆就好似不停對自己話…… 無嘢喎…… 無嘢呀…… 真係無嘢呢……
 
我都希望佢真係無嘢,不過,我知道佢根本無可能無嘢,因為有嘢嘅又唔係剩係得佢一個。
 
「呢排好多人行出嚟……」
 
「唔……」
 
「佢哋咁搞法,唔知會點呢?」
 
「雪雪……」
 
「嚟緊可能超過成百萬人。」
 
佢停咗一停,跟住又雪雪聲嘞。
 
「其實,佢哋咁做有無用呢?」
 
佢又停咗一停。
 
「不過,如果連自己嘅訴求都唔講出嚟先,根本就連以後嘅所謂有用無用都唔存在……你話係咪呀?」
 
佢夾住注麵定晒鏡咁。
 
「今個星期你都會出去過呵?」
 
我無等佢回應,拎起張單就走咗出去門口櫃位。俾完錢就直行出去,都無望翻轉頭。我都幾肯定佢仲係夾住注麵,郁都無郁過…… hang咗機咁。以佢嘅內置CPU,可能都要一段頗長嘅時間先可以update返個新version 嘅OS, 好彩嘅話,re-boot部機就可以run返部腦; 如果唔係,死咗機,佢就game over, 呢個hang機嘅情況就成日都會發生,咁就唔使玩嘞。希望佢真係搞得返掂個OS,決定到點樣做,咁大家就唔使咁辛苦嘞。呢條友,真係好煩。
 
今日同平時有啲唔同,我無喺下面行,我係喺上面睇。喺條橋上面望落去,密密麻麻嘅係好多好多人頭。由呢度灣仔天橋畫廊望去銅鑼灣,見到好多好多人行緊過嚟,過咗呢條橋,佢哋就向金鐘方向繼續,兩個方向都見唔到盡頭。呢班人大家各不相識,但係大家都係向住金鐘方向行,人頭湧湧,人同人之間嘅距離就越嚟越近,凝固到嘅力量變得越嚟越強大。呢啲咁澎湃嘅氣氛,有推翻天地嘅氣勢。或者真係可以改變到一啲嘢。就算我明知宜家我哋正處於一個大時代,所有嘅個人都變得好微不足道,但係,我偏偏仲係記掛住嗰個我最緊嘅佢……
 
就喺呢個時候,喺成千上萬啲人堆入面,我見到佢同佢……佢哋一個啱啱到咗橋底,另一個就喺後面。全世界都變成包圍住佢同佢,又好似全世界將佢同佢分開咗。但係,喺我眼中,我見到嘅就只係佢同佢。咁喺佢同佢心入面……又會唔會有過我呢?我心入面諗番起一首詩……
 

你站在橋上看風景, 
看風景人在樓上看你。 
明月裝飾了你的窗子, 
你裝飾了別人的夢。
 
究竟我係睇緊風景嘅,定其實我就係明月,窗子,甚至係夢呢?其實……會唔會我就係你……

留言


請按此登錄後留言。未成為會員? 立即註冊
    快捷鍵:←
    快捷鍵:→