返工放工呢回事 · Day006 每個人都有佢自己嘅節奏 精選

Day006 每個人都有佢自己嘅節奏

你唔好睇阿Ric佢成個palyboy咁，講設計佢唔會輕易認輸。醒即係醒，fit一聲就搞好個draft，正唔正就唔到我話，不過計budget就係我嘅工作。計budget呢家嘢話難唔難，話易唔易。可以好一本正經好專業，樣樣問清問楚好似打咗懵仔針咁一絲不苟咁做; 亦可以專業得嚟乜都唔問好似隊咗草咁迷下迷下滿腦幻覺咁做。呢啲場合，我哋呢隻又古板又唔識同人溝通嘅就梗係奉行估算界最高境界嘅斷估無辛苦啦。其實講真吖，都話明係個draft，仲要得過十零廿個鐘必出嚟嘅貨仔，有幾detail吖。你仲問長問短？佢有嘅都必咗出嚟啦。快快趣搞粒數出嚟做review做present就算啦。通常阿Ric都會問返我條數點嚟，我咪將我啲幻想噏俾佢聽，佢又好多時都照單全收，搞得掂照present㗎喎。可能呢個就係阿Ric口中話我sync到佢嘅原因啦。
就喺我迷下迷下嘅呢段時間，喺公司裏面有另一Team人做緊同一樣嘢，不過我好少理佢哋。好似跑馬拉松咁，落得場個個都做同一樣嘢㗎啦，你有你跑，佢哋有佢哋跑，唔通人哋加速放跑你就加速放跑，人哋慢跑留力你就慢留力咩。咁如果人哋停喺度唔跑，你又真係停喺度囉喎。做任何嘢都有一個最適合自己嘅節奏，呢個節奏可以令你喺最舒服嘅狀態發揮得最好，勉強自己模彷其他人嘅節奏只會亂咗自己應有嘅步伐。反而如果運用得好，佢甚至可以牽動其他人follow你嘅節奏。總之，就算做唔到帶住人，都千祈唔好俾人搞亂啦。但係公司呢樣嘢又邊有馬拉松咁公平吖。你唔理人啫，一樣有人會揾上門。

「我哋搞掂晒囉喎，你仲搞緊呀？」
喺我迷下迷下嗰陣，呢把令人軟一軟嘅聲音又殺到。我嘅節奏開始有啲守唔住。