返工放工呢回事 · Day010 想定唔想

講東講西呢回事 於 10/06/2019 發表 收藏文章
Day010 想定唔想

走上同一層樓就衝線打咭,咇!睇時間今次遲咗56秒。噙日大老板啱啱決定咗由我哋team lead個新project,我哋老細Victor就即刻要求今朝有個Joint Team Briefing講下單新project嘅嘢,其實就係想喺team B面前威下,一雪上次高級劏房之仇。呢啲咁鬥氣嘅表現,真係襯晒我哋老細嘅風格。我老細係Team A嘅Director, Victor Cheng,公司老臣子,做咗幾十年,年年話退休,年年都搶嘢做。基本上佢就已經上咗神枱亦都化晒㗎嘞,不過成日又貪玩又鍾意搞搞震,成個老頑童咁,乜都搶一餐。大佬呀,你就話隨時退休安樂無憂啫,千祈咪攞我哋個飯碗校飛至得㗎。我哋跟住佢,直程辛苦過日日跑馬拉松。佢喺香港地產最輝煌嘅年代入行,享受過晒每一個地產升跌浪帶俾佢嘅風光試煉。佢跟住大老板咁多年,乜都見過晒。對佢依家嚟講乜嘢project都係遊戲嚟嘅啫。係咪好瀟灑呢?所以Richard同佢真係perfect match,一個懶有型,一個真瀟灑 (其實我係唔敢同樣用個懶字)。

個briefing有另一team嘅Director坐喺度,就係Ba姐,佢嚟到坐低咗,全程膠面,黑级氣場,坐咗十二分鐘之後留低程小姐就走咗嘞。程小姐今日一如以往咁梳咗條過肩嘅長長髮辮,淡裝配清幽香水,causal dress up一路安安靜靜坐喺度聽我哋老細講,聽Richard講,間中佢會講下佢嘅睇法,呢啲睇法通常都好切合佢担當緊嘅角色,就係提升個project新鮮感,令個project嘅形象young啲前啲。呢啲位連老细同Richard都聽得好舒服。而我就好用力咁令自己盡快習慣同佢一齊正正常常咁開會,呢啲場口嚟緊會越嚟越多,早啲慣總好過唔知幾時慣。要盡快揾返自己嘅節奏。

老細三幅被再三反反覆覆後「好嘞,嗱,俾心機搞好個盤嘞。」一到lunch老细又做到個咁靚嘅ending嘞。

「一齊Lunch?」Richard先開口。

「我約咗人……下次先啦。」好彩。

「拜拜。」呢句佢望住我講。之後就轉身走咗。終於可以鬆一口氣。

「走咗嘞。」我見到啦。

「唔怪得之Ba姐咁睇佢啦,真有料,又唔會令人好唔舒服,無Ba姐嗰種殺氣。呢隻先至真係食咗你都唔知呀。」佢好似有啲嘢想講。

「俾個機會你,你同佢夾下co-working & co-habitating space嗰part想點搞,要做到幾大,攞條數放埋落個budget睇下。嗱,要點行就睇你自己嘞。」喂喂喂!你俾我定一定神先得唔得。

「無問題。」

「有問題唔使自己頂晒㗎,有乜就攤出嚟講,收收埋埋唔清唔楚無著數,對大家都唔好。」乜嘢唔清唔楚呀?邊個大家?佢噏緊乜呀?

下晝約咗程小姐傾project,佢啲料好足亦好清楚。三兩下就傾得七七八八嘞。

「今次你哋個proposal都穩陣。」

「老细不嬲都係穩陣啲嘅。不過你哋啲橋都好有gimmick呀。今次都係第一次team A同team B合作。」嗱,我醒咗㗎喇,識得揾啲嘢講。

「唔……都係嘅,都幾好吖,嗬?」

「唔……都係幾好嘅……咁你老细點呀?」

「有乜點吖。大老板都決定咗嘞。佢最睇唔開嘅都做緊啦,少少唔想一定有。」

「咁……你有無唔想呀?」聲音要keep得好平靜,不過今次我對眼無望住其他嘢,而係望住佢。

佢停咗一停,望一望我,好似俾我嚇一嚇咁:「嘿?乜嘢唔想呀?」我諗佢無諗過我會咁講嘢。

「無,我係問你自己有無唔想同我哋合作。」

「哦,係…係… 大老板決定咗,都無得話想或者唔想…… 都無得揀啦。」

「如果有得揀呢?」我對眼無離開過佢。

佢再望一望我,咀角好輕輕咁彎一彎:「如果?咁你話呢,你想定唔想?」

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→