返工放工呢回事 · Day011 二百萬人嘅唯一

講東講西呢回事 於 23/06/2019 發表 收藏文章

Day011 二百萬人嘅唯一

佢唇角輕輕咁向上一彎: 「你想定唔想?」佢對眼望住我對眼……

以前睇過本書叫相對論,愛因斯坦講時間會變長變短嗰個理論呀。內容好艱深,但意思可以好易明。佢有咁講過
把你的手放在滾熱的爐子上一分鐘,感覺起來像一小時。坐在一個漂亮姑娘身邊整整一小時,感覺起來像一分鐘。這就是相對論。
喺呢一刻,時間變到好慢好慢。原來問咗一條咁難回答嘅問題。一路諗一路諗…… 可以點答,應該點答…… 諗返每日等車返工嘅情景。有啲人你留意咗好耐,有無數次嘅擦身而過,有數不盡嘅眼神接觸,諗咗好多無謂嘢,等咗好多嘅巧合,下定咗不計其數嘅決心,瞄準過太好嘅時機,錯過咗太多嘅如果。就係咁,見住佢由單身變成人妻,再由人妻變成媽媽。就係咁,一個個fantasy就烏下烏下咁過咗。有時仲會諗,唔知佢心入面有冇曾經有過自己呢?如果嗰時我乜嘢乜嘢,咁而家可能已經點樣點樣…… !做人係咪應該要簡單啲,有嗰句講嗰句呢?抑或安安全全咁留喺自己嘅comfort zone扮晒乜都無所謂咁好啲呢?又或者最真實嘅其實係根本就拎唔出勇氣簡簡單單將自己嘅諗法表達出嚟。久而久之就習慣咗後悔呢樣嘢。習慣到一個程度你會鍾意咗佢,甚至好似吸毒咁依賴佢,搣佢唔甩。好多人仲會好享受呢種近乎自虐嘅痛苦,好享受將自己扮成悲劇主角。我明白呢個睇法,因為我一直都係用呢個咁嘅方式生活。曾經有人講過: 人生如果無悔,你話幾咁無趣。我覺得呢句說話好應。

「遲啲話你知。」我對眼不知所措咁眨二下移開咗,前幾日我就係咁答咗程小姐。講完呢句我就轉身走咗。心諗,或者又有一個fantasy 走咗嘞。

一個人跟住大隊一路行,個腦不停諗返前幾日答佢嗰陣係咪可以做好啲呢,我以為會好似以前咁諗吓諗吓一路享受後悔一路不知不覺咁就會無事。但今次唔work。因為喺心入面嗰種後悔變得越嚟越清晰,揮之不去。而且仲變得越嚟越強大,我知道今次好唔同。

一個人跟住大隊一路行,大家各不相識,但係大家都係向住金鐘方向行,人頭湧湧,人同人之間嘅距離就越嚟越近,凝固到嘅力量變得越嚟越強大。呢啲咁澎湃嘅氣氛,有推翻天地嘅氣勢。連天地都可以推翻,咁仲有乜嘢好驚呢。今日喺呢度嘅每一個人都係為咗爭取幸福而嚟,有二百萬人一齊走出comfort zone,夾雜著好多嘈吵聲,簡單直接將自己嘅諗法表達出嚟。或者,我可以借助呢二百萬人嘅勇氣再為我自己爭取多一個小幸福呢。要將fantasy揾返出嚟,喺過咗灣仔天橋畫廊入金鐘嘅呢一刻,我拎起電話打俾佢…………

「喂。」接上咗。

「我依家想話你知……」

「乜嘢呀……」佢嗰邊好嘈。


喺電話嘅另一邊同時傳出嚟嘅聲音係「……下台!……下台!」同我身邊聽到嘅聲音係同步嘅。

「你依家喺邊度?」

「啱啱過咗灣仔橋……」我即刻週圍望周圍揾,然後我見到一個背影,我見到一條過肩嘅長長髮辮……

「我想同你一齊,我想同你一齊一路行落去……」我帶住二百萬人嘅力量簡簡單單咁向眼前呢個二百萬人以外嘅唯一表達咗我對佢嘅想法,我嘅訴求。

「.........」

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 紫蜜語
    紫蜜語 於 07/07/2019 評論 NO. 1

    程小姐係美女 ;)?

  • PMYIFP
    PMYIFP 於 07/07/2019 評論 NO. 2

    以一般人嘅準則算係。

  • 紫蜜語
    紫蜜語 於 10/07/2019 評論 NO. 3

    wow~~~~~ ;) 期待之後嘅發展

  • PMYIFP
    PMYIFP 於 10/07/2019 評論 NO. 4

    故事暫時完咗。請俾多啲意見

快捷鍵:←
快捷鍵:→