返工放工呢回事 • Day008 戚眉彎咀聳聳肩 精選

Day008 戚眉彎咀聳聳肩

「喂！等緊你呀，澤！」咪砌緊囉。
「唔好剩係掛住傾密偈就擺低我哋至得㗎。」又呷醋嘞，繼續吖。

「我哋都約咗大老板聽朝跟佢哋尾做present呀。」吓，又玩呢啲。

「好快，20分鐘。」20分鐘呢個係magic figure，佢最神奇嘅地方並唔係我可以喺呢20分鐘內就能夠完成全部工作; 而係因為呢個20分鐘係一個好合理時間。時間太短，無人會信你可以喺咁短時間搞得掂; 時間太長，無人會有耐性等你慢慢搞。20分鐘好易打發; 冲杯咖啡，睇下emails，fit一聲就過咗，所以呢個時間長度最容易打發人。無論你最後用咗幾多個20分鐘。

做完review搞埋個presentation俾老細都已經成11點幾，有乜嘢就等聽朝present先算嘞。
「喂，你同程小姐搞乜啫？」食緊嘢你講依啲？

「冇乜嘢搞喎。」

「無嘢？無嘢就唔會成日剩係揾你唔揾我哋其他人啦。」我都想知點解呀，老友。

「都唔係吖，佢個人係比較cool啲，不過我見佢都有同其他人講早晨。」

「講到同人好似好熟咁，佢個人cool啲點樣點樣你又知？仲話無嘢。」咁你想點呀？

「會唔會佢有嘢你收唔到呀？」你都話我收唔到嘞，咁我又點知呢。

「其實你咁問對個project有乜嘢關係呢，Richard哥？」
「不嬲都唔係講緊個project。純朋友齋關心，無商業原素。睇下有乜嘢幫到手啫。」呢餐你埋單就最幫到手。

「多謝關心嘞。咁你覺佢啲嘢得唔得？」

「身形，樣貌，聲線都得。」又嚟嘞。

「講做嘢呀，大佬。」

「我同佢都未做過，我點知喎。」嗱，係咪呢？我笑住咁斜睥一睥佢。

「講真，佢啲橋都幾前，不過設計就唔夠我嚟嘞。你知啦，我地老細唔鍾意走得太快㗎嘛。呢度可能會俾佢入到少少。」

「上次條高檔劏房橋咪俾佢哋攞咗啦，都幾得㗎。」终於正常返。
「條橋我哋都有諗到，不過老细唔想用，想做啲大路嘢。你都知啦，佢鍾意威，就算劏房揾到錢佢都未必肯制。」你都係咁諗㗎。

「大老板睇嘢係需要闊啲嘅。今次又睇下點囉？」

「今次個project大好多，正路嘢我哋應該著數啲。老细專登跟佢尾就係想格一格佢啲gimmick嘢，拉返大老板埋嚟啲大路嘢度。」呢招我明。

「咁聽日就靠你將個proposal吹靚仔佢嘞。」

「不嬲都好靚仔。我反而想睇下佢靚唔靚得過我，你認為呢？」

唔類問題好考功夫，唔答好過答，無聲勝有聲。同步戚眉，彎咀，聳聳肩，再拎起隻杯呷一啖，望望電話講一句 : 「走嘞。」跟手起身走人佢埋單，連消帶打又賺一餐。揮揮手「聽日見。」搞掂都已經係零晨一點幾嘞。