返工放工呢回事 · Day002 日日見都可以好陌生

Day002 日日見都可以好陌生

「現在嘅時間係8點19分……」大鑊，遲到！由懶床到彈起身，再由擦牙洗面換衫出門口，每個動作都做咗過千次，非常熟練; 熟練到做完都唔記得自己做咗。呢種熟練其實好危險，佢會將你嘅生活一點一滴地攞走，令你變得越來越麻木，就係咁你不知不覺間就失去咗生命嘅一部份，永永遠遠揾唔返呢個失去嘅生命。

去到同一個巴士站排同一條隊搭同一號嘅巴士，見到同一班人排隊，個個都熟口熟面，有啲人你留意咗好耐，有無數次嘅擦身而過，有數不盡嘅眼神接觸，諗咗好多無謂嘢，等咗好多嘅巧合，下定咗不計其數嘅決心，瞄準過太好嘅時機，錯過咗太多嘅如果。就係咁，見住佢由單身變成人妻，再由人妻變成媽媽。就係咁，一個fantasy就烏下烏下過咗。有時仲會諗，唔知佢有冇有過自己呢？如果嗰時我乜嘢乜嘢，咁而家可能已經點樣點樣…… 𠳏！邊有咁多唔知如果可能吖。不過唔使驚，呢啲咁嘅fantasy又點會少呢。
「下一站創紀……」嘩！落車先講。