返工放工呢回事 · Day003 全馬唔易跑都要跑 精選

Day003 全馬唔易跑都要跑

每日返工入同一座大厦上同一層樓就然後衝線打咭，咇！睇時間今次慢咗1分06秒。有時喺度諗自己好似跑緊半馬拉松到達终點咁睇時間對成績。唔同嘅係打完咭仲有個全馬喺前面呀，陰公。

「喂！老细吹雞呀！」全馬正式開始。一早開波呢啲叫briefing嘅嘢殺傷力其實好驚人，啱啱跑完半馬，條氣都未順，水都無滴落肚就再嚟一個全馬。魂都未回就去搶check point，重要唔知跑邊條路線，問你點頂。立即揾啲老友搞啲賽前準備先。

「喂，為乜吹雞？」

「你慌唔係有新project開波咩。」
「拍咗板係我哋呢team搞咩？」

「你第一日跟你老细呀？佢成日都當自己單單都有份㗎啦; 係唔係都當真做……住先，做下做下入到圍就當真; 衰咗咪當proactive management囉，唔係大老板點睇到佢個搏樣呀。」

呢個咁有見地嘅老友叫做Richard, 則師底Project Manager睇晒成個project。則師, Architect, 曾經有人形容Archi係藝術與理學才能嘅完美化身。嘩！好勁呀！回帶睇睇，其實只不過係嗰啲讀理科又讀數又鍾意畫公仔做手工嘅同學仔揀嘅科。反而要捱過HKU嗰5年又要捱埋做嘢嗰幾年去考則師牌就真係唔易㗎。如果唔係就唔會有個最上鏡嘅靚女走咗去参選香港小姐啦。

Richard係公子型嘅則師，平時衣著官仔骨骨，對details好敏感好有品味，typical designer style. 自信到呢…… 呢個其實係佢自己話嘅啫，我睇咪又係男人麻甩一個，唉。
「好嘞，嗱，俾心機搞好個盤嘞。」俾老细嗰三幅叫briefing嘅被反來覆去反轉又反轉咗十九幾次，一到lunch就做到呢個咁靚嘅ending嘞。呢句話咪就係使死人，做死你嘅金句囉。你可以話唔玩咩？跑唔掂都要跑㗎啦，老友。