返工放工呢回事 · Day007 令人滿有快感的吃力 精選

Day007 令人滿有快感的吃力

做任何嘢都有一個最適合自己嘅節奏，如果呢個節奏俾人搞亂咗，你可能會跑唔到終點。
「咁快搞掂？我仲爭少少。你哋幾時做present？」當我做緊嘢嘅時候，我把聲可以好似好平穩，只要唔好望住佢。

佢輕輕咁向前靠向我少少，聲線再放輕咗少少 : 「約咗大老板聽日上午。」

使唔使呀？搶成咁。咁即係我哋慢咗啦。

「今次你自己上定係你老细上？」弊，開始守唔住，噏埋啲咁無質素嘅廢話tim。

「我無所謂，等老细決定啦。」

嗱，呢啲咪叫做廢問廢答囉。
「哦。」單字係咪穩陣好多呢。

「咁你哋呢？」

明知故問，都未做起又點present呀，小姐。

「未定呀，睇老细啦。」嗱，又係廢問廢答。

「唔嘿……咁……好啦……唔該。」

又唔乜嘢該啫，都無幫過你，餐餐都係咁。不過唔知點解，由佢把口講出嚟嘅呢句「唔該」硬係好熟口熟面咁……

來來回回九句說話，就好似已經跑咗成程全馬咁吃力。呢個世界係唔係每個人都好似我咁會有另一個人令到自己好吃力嘅喇？我唔知道……不過呢種吃力對我嚟講好特別，就好似你完成咗全馬之後，成個人身體散晒，但精神上就彌漫住嗰種好high好high嘅快感，好耐好耐好耐都唔會散去....…
「喂！等緊你呀，澤！」

哎，都話咗啦，守唔住自己節奏真係好麻煩，都明知佢係專登㗎啦，自己偏偏就走唔甩亦唔明佢點解要咁做……可能係自己諗多咗啫……都應該係自己諗多咗㗎嘞。