上班下班呢回事 · Week006 Redemption 自己俾自己嘅救贖 精選

上班下班呢回事 · Week006 Redemption 自己俾自己嘅救贖
「……你最快可以幾時返工？……」

當我望住呢對AJ11行過嘅時候，我改變咗我嘅想法，我諗呢對AJ11嘅主人會唔會真係佢呢？呢對曾經令我不知不覺變咗嘅AJ，令我離開咗我住咗年半的一個地方，搬咗去另一個新嘅環境，再次過返一個人住嘅生活……同時，我知道自己再見唔到嗰對每日返工都會見到嘅AJ……呢個亦係我自己俾自己嘅redemption，自己俾自己嘅救贖。

「我最快要一個月通知……」我改變咗我嘅決定。

就係咁，我入咗呢間公司。喺我第一日返工嘅時候，我嘅諗法得到肯定; 一個我曾經日日都見住，但係好陌生嘅人，亦係呢個人將我帶嚟呢度。
佢係A team嘅人，大家唔同team做嘅嘢都好獨立，接觸嘅機會唔多。最多都係同大老板開例會時會接觸多啲，不過我就時不時會揾啲嘢揾佢。佢哋team係舊team，係公司嘅基礎，個底夠厚，剩係做返啲傳統項目都夠做，所以佢哋team唔會時時都咁忙。反而我哋team係新team，成日都想諗啲新projects擴大市場提升知名度，無時停，不停跑新嘢，睇住市場興啲乜嘢，有啲乜嘢新嘅玩法都會考慮，咁樣追住搞會好忙，好容易會搞亂自己嘅節奏。相反，揾啱咗自己嘅節奏，keep住市場同步甚至帶住佢其實係好刺激好好玩，咁樣仲可以証明自己睇到一啲其他人睇唔到嘅價值。

好似早一輪興劏房咁，我哋就揾幾層樓upgrade做高級劏房，成個project唔使一年就搞掂，仲賣得好好tim。大老板好滿意，因為啲劏房upgrade咗就唔再係劏房，係studio flat，係精品房，係年青人afford得起嘅自主空間。成件事high咗，形象年輕晒，好多父母都可以幫到啲仔女上車，好多大發展商即刻跟住入紙改則，巿場即刻接受咗呢個玩法，出咗好多細單位。我哋阿姐就攞晒彩，佢對我都相當滿意，仲話我係佢嘅福將tim。女上司同女下屬有咁嘅關係，我覺得自己都幾幸運。嚟緊可唔可以保持啱自己嘅節奏再下一城，就要睇觀塘個重建項目嘞。呢個係一個好吃力嘅事情。
見到team A佢哋啱啱開完會，我走過去想睇下佢哋有乜嘢料，都未行到Richard已經行開咗。

「今朝係咪講緊觀塘個盤？」我行埋少少佢身邊講……

「吓？」佢諗咗一陣，無擰轉頭，對眼望實個芒。

「你哋想攞嚟做？」

「唔。」佢唔承認亦唔否認。

「大老板都未定喎。」

「係喎。」咁即係仲有機會啦，唔該晒。

「咁……好啦……唔該」佢最後都無擰個頭過嚟，剩係望住個芒。我知佢唔係唔想望住我，佢唔望我可能係想争取少少空間等佢可以舒服啲咁同我相處啫，我明喎。呢種相處模式就好似兩個人中間隔住塊封咗一層薄簿微塵嘅玻璃咁，你確實知道玻璃嘅另一面就係佢……但又確實睇唔通佢……有啲人會咁樣形容呢種狀況 …… 曖昧。
當我一步一步慢慢咁行返埋我自己個位嗰陣……我知佢雙眼一直無離開過我……呢種感覺其實都幾爽。