上班下班呢回事 · Week009 如果 - 想從新嚟過嘅迷思 精選

上班下班呢回事 · Week009 如果 - 想從新嚟過嘅迷思
「我哋公司需要一個地標性嘅項目，亦唔可以過於傳统缺乏新意。呢個project你哋兩team一齊搞。Victor你嗰team take lead; Barbra 你哋team B creative啲喺co-working space 同埋gimmick嘢方面做support，就咁。」

呢個就係老總做嘅總結。呢個結果其實Barbra同我早就預咗，不過預咗並唔代表可以好坦然咁接受到，最起碼表面上係接受唔到。就算Barbra知道呢個結果對佢嚟講係最有利，唔使take risk仲可以in charge project嘅主要賣點，最重要嘅就係老總心入面清楚知道Barbra好清楚自己嘅位置，同時做咗一個好顧全公司大局嘅proposal，呢一點肯定對Barbra將來有好大好大幫助，老總以後肯定當Barbra係自己人。從呢個角度睇，雖然我哋表面上係赢咗idea輸咗project，但其實我哋係project輸唔晒，仲赢盡老總心意tim。而Barbra最醒最醒嘅地方係，佢表現到自己好似輸咗咁，咁樣就可以減低team A嘅戒心，可以輕鬆自然咁参與呢個project，同時可以令老總唔使担心我哋兩组夾唔嚟，咁樣老總就煩少好多好多。
好快就同team A開咗第一次Joint Team Project Briefing會，約咗下晝同佢傾啲budget。第一次夾budget，啲料一早準備好啦。唔使一個鐘頭就已經傾得八，九成嘞。

「今次你哋個proposal都幾穩陣。」我讚佢哋。

「老细不嬲都係穩陣啲嘅。不過你哋啲橋都好有gimmick呀。今次都係第一次team A同team B合作。」

「唔……都係嘅，都幾好吖，嗬？」

「唔……都係幾好嘅……咁你老细點呀？」

「有乜點睇吖。大老板都決定咗嘞。佢最睇唔開嘅都做緊啦，少少唔想一定有。」我又點會話俾佢知Barbra其實好開心吖。
「咁……你有無唔想呀？」佢聲音keep得好平靜，不過今次佢對眼無望住其他嘢，而係望住我。

我停咗一停，望一望佢，佢究竟知唔知自己問緊乜嘢:「嘿？乜嘢唔想呀？」

「無，我係問你自己有無唔想同我哋合作。」佢好少咁直接喎。

「哦，係…係… 大老板決定咗，都無得話想或者唔想…… 都無得揀啦。」無預到佢會講呢啲，我開始有少少亂咗節奏。

「如果有得揀呢？」佢對眼無離開過我。

呢一刻嘅佢好接近以前喺巴士站嘅佢，嗰個感覺完完全全咁返番嚟。

我記得曾經有句說話: 「如果，我有多一張船飛，你會不會同我一齊走？」

呢句如果嘅主人始終無勇氣講出呢句如果。如果呢句說話好多時都係過去咗先至想講，就好似好希望呢句說話有能力將個結果改變一樣，所有嘢可以從新嚟過。
而佢，已經用咗好大嘅勇氣講咗呢句如果，我係咪都應該要鼓起勇氣，用自己嘅感覺直接回應佢嘅如果呢。

我再望一望佢，強行壓抑住自己嘅情緒，咀角好輕好輕咁彎一彎:「如果？咁你話呢，你想定唔想？」