公司公私呢回事 · Task009 等，都可以好唔同 精選

公司公私呢回事 · Task009 等，都可以好唔同
 自從佢兩個開完會之後，呢個世界就唔同咗。最唔同嘅就係乜嘢都無變到，大家都好似平時咁返工放工，上班落班，開會呀，做briefing呀……睇落無啲乜嘢同以前唔同，阿澤仍然成日望住個芒，仍然好專心，做嘢仍然好爽手，個project都行得幾順，A，B Team都合作到，雖然Ba姐好少嚟開會，但程小姐俾嘅points就仍然係好到位，不過……佢睇上去仲正咗，比以前仲正咗……就好似成個人發晒光咁，行起步路上嚟都好有節奏感，又輕盈又俐落。比起以前嘅佢，多咗好多快樂嘅感覺，眼尾、咀角都流露住喜悦嘅神態。佢由以前嘅淡淡然變到擁有好多顏色。呢種變化就好似佢喺度等緊一啲好事發生咁。
 
「係咪有啲咩嘢事發生咗？」 
我喺pantry見到程小姐，佢無乜回應。
 
「呢排你好似唔同咗。」
 
「係咩？」
 
佢一邊冲咖啡，一邊笑笑口咁答我。
 
「係呀，成個人好shine，好有energy，好吸引。係唔係搞清楚咗啲嘢呀？」
 
「唔……都無乜特別吖。」
 
佢呷咗一啖咖啡，望住自己個杯，然後繼續講。
 
「只係……有啲嘢可能無以前咁唔清唔楚……需要啲時間啦……」佢瞄咗我一眼。 
「依家都無乜嘢需要做，咪等下囉。」佢笑笑口咁講。我睇得出佢好enjoy呢份等待，可能，佢知道只要係值得，等，其實唔痛苦，相反，等變成快樂嘅前奏，等待越長久，快樂就越持久，就越可以慢慢咁享受呢種患得患失得嚟又其實幾肯定嘅感覺。都幾茅盾，係㗎，但又好有快感。成世人可能無幾多次可以享受到呢啲咁茅盾嘅快感，撞到就梗係希望可以慢慢享受啦。
 
「開心嘢就唔怕等嘅，妨且都逼唔嚟又急唔嚟。」呢句好唔型，聽得出有啲葡萄。我嘅節奏又一次俾人搞亂左。
 
「唔嘿……咁……遲啲再傾……」佢回應咗我嘅葡萄，然後拎住杯未飲完嘅咖啡行返埋自己個位度。睇住佢慢慢行開，我覺得自己越嚟越遠……我望住自己冲緊杯咖啡，個腦就諗起嗰個望住個芒嘅佢。呢條友就最唔清唔楚…… 

佢就啱啱相反，平時都夠沉㗎啦，依家直投死寂。睇落就好似好專心，無錯呀，效率係好咗，不過就硬係爭咗啲嘢……佢無咗以前佢擁有嘅一種特質……一種佢以往賴以生活嘅方式……
 
阿澤佢好宅，遇到乜嘢事都係會收收埋埋，佢係嗰種成日諗乜乜乜，會唔會咁咁咁，又或者物物物，可能如果遲下先又點樣點樣，搞到自己攬住成身幻想，一堆堆後悔，數唔晒嘅無所謂嘅人。久而久之，呢啲原本會令人後悔，痛苦，struggling 嘅嘢，俾佢拖下拖下，搞下搞下，受下受下，慣下慣下，竟然俾份佢慣到一個程度佢會鍾意咗後悔呢樣嘢，甚至好似吸毒咁依賴佢，搣佢唔甩。好多人仲會好享受呢種近乎自虐嘅痛苦，好享受將自己扮成悲劇主角。我諗我明白佢呢個睇法，我知道佢一直都係用呢個咁嘅方式生活。其實，我有時都會係咁……將自己擺喺呢個安全地帶入便。曾經有人講過: 人生如果無悔，你話幾咁無趣。我覺得呢句說話阿澤係最有資格領受嘅其中一個人。 
透過呢啲幻想，struggling ，後悔，痛苦，又再幻想，再struggling ，再後悔，再痛苦嘅無間輪廻，佢喺佢嘅comfort zone 揾到佢嘅生存之道，至少一路以嚟呢個way對佢嚟講係work吖。我以為佢都會好似以前咁諗吓諗吓一路享受後悔一路不知不覺咁就會無事。但今次唔work……佢未必等到，因為喺佢心入面嗰種後悔不但無blur 到，仲好似變得越嚟越清晰，揮之不去，而且仲變得越嚟越強大，我知道佢今次好唔同。