飯戲攻心吐春光耍花樣 精選 推薦

飯戲攻心吐春光耍花樣
 
「飯戲攻心」呢四個字喺今日係代表咗最本土嘅「撑」。喺呢個幾百萬人生活嘅地方，呢幾年不但無咗可以依靠嘅嘢; 連想揾啲去「撑」去付出嘅嘢都好似揾唔到咁。飯戲喺呢個大時代俾咗一個凝聚大家嘅平台俾嗰啲仲想為呢個地方付出嘅去付出。飯戲背負咗唔只千千萬萬嘅寄托，係成過百萬嘅寄托。咁究竟係人「撑」佢，定係佢「撑」人？真係唔係咁易搞得清楚。 飯戲做到棟篤始祖一直想做到嘅嘢。佢成就佢？定佢成就佢？可能係彼此互相嘅成全。完美嘅成全，完美嘅遺憾。
 「如果，我無打錯嗰幾個字，我哋宜家會點？」
「如果，我有多一張船飛，你會唔會跟我走？」
「不如，我哋從頭嚟過……」
 咁係咪一種吶喊呢？呢場男女攤牌戲用咗好春光乍洩嘅音樂，好黎耀輝，好腰心腰肺…………呢幾秒可能係最接近將時間停頓嘅幾秒…………片尾嘅伸延，當大佬自己喺房，聽到二佬喺廳嗰番說話，好花樣年華，好身有屎好心虚…………呢場戲真係好「王導」，係「王導」嘅精髓。咁算唔算係一種致敬，一種撑呢？ 「攻心為上，攻城為下; 心戰為上，兵戰為下。」放眼人心內在為上; 放眼市場票房為下。放眼情感為上; 放眼計算為下。漂亮，係天時地利人和。流水無意戀落花，落花命定隨流水。