《殺神John Wick 3》—— 武俠片格局的西方動作片

中佬阿力Cool 於 18/05/2019 發表 收藏文章

因為一隻狗、一輛車,令退隱多年嘅殺神John Wick重出江湖大開殺戒,電影去到第三集,復仇成功嘅John Wick因為被高桌會發出懸賞令,結果被全城追殺。

《殺神John Wick 3》基本上130分鐘都係由頭打(殺)到落尾,殺人場面都比上兩集豐富同血腥,除咗鎗戰、騎馬、飛刀、柔道、拳腳交等等乜都齊。上集就用鉛筆,今集就用圖書同7尺NBA球員Boban對打,齋講打鬥場面應該會係三集最多同最好嘅一集,反而係最尾打日本人「讓賽」就有少少失望,始終拳腳對打,同短小精悍嘅東方人比奇洛係爭啲。

今次除咗John Wick自己外,中間仲有由荷爾芭莉飾演嘅Sofia助陣,Sofia戲份唔算好多,但形象性格突出,加埋兩隻「可愛」狗狗助陣(專咬春袋,睇到就痛),有型到爆。

John Wick電影另一個最吸引地方,就係整個世界觀好似武俠片一樣,江湖上有各路人馬:有至高無尚嘅高桌會訂立規則;判官、日本殺手執行高桌會指令;遍地殺手接order殺人;「丐幫」散播謠言,加上酒店、血印同金幣等等設定都令電影格局提升,唔單單係純粹一套無腦瘋狂殺人片。

有網上統計,John Wick第一集殺咗77人,第二集殺咗128人,第三集由頭殺落尾,應該都超過100人,所以話,世界上有兩樣嘢碰不得,一係里安納遜女兒,二係奇洛李維斯嘅狗。

喜歡文章請讚好
Instagram: https://www.instagram.com/arlikcool/
Facebook page: https://www.facebook.com/ahlikcool/

留言


請按此登錄後留言。未成為會員? 立即註冊
    快捷鍵:←
    快捷鍵:→