長大，就係忍住屌你老闆嗰句粗口 精選 推薦

有句說話，係講人嘅長大有三次：第一次係你知道自己原來唔係世界嘅中心；第二次係你發現原來就算你點努力，有啲嘢都無能為力；至於第三次，就係你明知未必會成功，都豁出去盡力爭取嘅時候。
細細個，年少輕狂，做啲乜要考慮後果？所謂「後果」如果係後日先要面對，聽日一樣遊戲人間呀唔係咩呀。

但人大咗，就唔係吓吓都懶型得起。做完一分鐘英雄，分分鐘做一世狗雄。有邊個唔知天下間老闆嘅戇鳩係一山還有一山高？就算你幾咁想當全公司面屌柒佢，明明就嚟屌到出口，結果你都會忍氣吞聲，同老闆講句：「唔好意思，下次我會再做好啲。」



讀大學幾多年，我就玩足咁多年，係個名副其實嘅廢青 —— 唔見天光唔瞓覺、唔到絕糧唔補習、唔到考試唔返學……直到出嚟做嘢，先驚覺原來自己都可以一個禮拜五日，幾唔願意都死死地氣七點起身返工。我以為，咁就叫長大。
但可惜長大比我想像中來得複雜。



長大，係當你覺得份工日日OT無晒生活都唔可以劈炮，因為卡數唔可以唔找、家用唔可以唔俾。
長大，係當你想去個working holiday但最後都唔敢，因為你已經任性咗好多年，唔可以做多一年蛀米大蟲 。
長大，係當朋友聚會講起幾錢人工唔再敢出聲，因為你知你條讀過大學嘅廢青係搵得少過IVE畢業嘅老死。
長大，係當你發現就算點樣唔食早餐帶飯唔睇戲唔去旅行都唔會買到樓，因為土地問題。
長大，係當你明白就算當日佔中佔到食橡膠子彈死Q埋都無用，因為有生之年共產黨都唔會俾民主戰勝歸來。
長大，係當你發現，識到個人人羨慕嘅靚女女朋友，都唔及以前有個對你不離不棄嘅人、晚晚等你返屋企嘅人咁幸福。

長大，係當明明你由細到大嘅志願係改變世界，卻原來已經俾世界改變咗你，而咬牙切齒起誓點都要飛黃騰達嘅呢一晚……

************************************

網絡作家B612 – Facebook專頁：b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」