【旅行啤啤佢】仲驚緊去大陸會俾人割左個腎個陣，不如驚下係香港供樓供到賣腎啦（下）

三年前，我家小弟大學一年級嗰陣去左杭洲實習一個月，返來嗰陣佢話喺杭洲基本上成個星期可以唔洗帶錢都無問題，因為周圍即使賣早餐啲地道檔口都可以微信支付，但估唔到即使而加香港都仲未習慣手機支付模式。

今次到上海，因為只係四日三夜，所以都只係留在外攤走動走動而無過黃埔江嗰邊。到埗個晚，我地去左好似都幾出名嘅"外婆家"食第一餐晚餐，但比起好味的杭洲菜更令我覺得有趣的是等位時候所見到嘅安排：

因為餐廳受歡迎，都好多人排隊，所以佢專登排左幾部iMac喺出面俾啲小朋友玩

而且門外有好多位俾人坐，又有水飲；排隊嗰陣仲可以輸入電話號碼，到嘅時候會有sms（但係香港到而加都未係流行做法）

大家一齊出去玩個陣，一行四人，有時搭地鐵但有時會call "滴滴"，落單之後接到單嘅司機會打俾你確認同講幾時到，用微信支付就搞掂，成個過程好舒服好方便。然後我地到左一個大型商場裏面一間食台灣豆品嘅食店，跟住發覺好似間間店鋪都有免費不限時wifi，就算係一啲商場外面嘅空地都有用微信上嘅wifi。周圍行嘅時候發覺上海都有好多間starbucks，但唔同香港，每間starbucks都有唔同裝修，每間都好特別，唔會好似香港咁間間都大同小異，從無諗過，starbucks都係一個焦點。
有個叫"新天地"嘅大型商場，本來都無抱咩大期望，因為大商場喺香港真係比比皆是，但上海呢個新天地真係有驚喜，因為商場出面嘅地方好多舊建築群，而重要的喺，政府賦予佢新嘅用途，例如變做食店，cafe，藝術館等等，成為左一個好特別嘅旅遊地方，即使舊建築身處在要發展的地方上，都只會將佢地搬到附近而唔係拆左佢，喺香港就已經拆左好耐。而呢種保育發展方式通去外攤條好受遊客歡迎嘅大街都可以見到

你會見到forever 21變左好似教堂
zara變左成座歐洲政府大樓

我地其中一站去左一間舊報館改裝而成嘅cafe，老闆為左向報館致敬，cafe名叫申報館，而裏面掛左當時報館存留嘅相片同報紙，圓拱型的天花上仲留有當年的雕刻，令呢座舊報館又有一個新生命，但同時留有昔日的味道。

由晚飯嘅飯店行返酒店嘅時候，發覺成條步行路都種滿了樹。行嘅時候都好舒服。

除左去建築群，我地仲有去當地一啲私人辦嘅藝術館參觀，嘩印象真係好深刻，每一期都有一個藝術家喺嗰到做展覽，但一幢藝術館有6-7層，一個藝術家有咁多野展覽？原來真係有，每一層都係一個主題，入場個陣，前台會俾部機仔你，每到一層，只要輸入返個層數，就會有一段關於個主題嘅錄音講返背後意義，但大家聽到藝術館應該都會覺得好悶，啱嘅，因為香港比較多擺設展覽性嘅藝術館，令本身無興趣嘅人就覺得好悶，但呢度係用裝置藝術嘅模式展示，用唔同嘅媒介去講一啲信息


呢個係我去嗰次做緊嘅展覽
係到仲買左本藝術家擺放嘅書，哈哈原來都係其中一樣展覽品，都無試過可以買展覽緊嘅"藝術品"返屋企
所以你可以走入去玩，去聽，去摸，去睇，仲有咖啡飲添。係香港真係好難做到，因為唔會有人願意用個咁大嘅地方去搞私人藝術館。

花心思去做保育，搞藝術，去提升顧客體驗，都是花左錢但唔會直接同短期有經濟回報嘅事，所以係香港咁講求短期金錢回報嘅社會，真係好難見得到。