【愛情啤啤佢】發脾氣其實可以好無聊，無聊到都無意思講出來

拍拖總有嗌交嘅，但有得嗌我覺得好過無得嗌。

拍拖初期就經常嗌交，因為性格大家都比較極端，但嗌嗌下又真係增加左對方嘅認識，知道對方嘅底線，死穴，所以漸漸地變左只係獠交嗌嘅性質，就唔係真嗌交。身邊有啲朋友話從來都無嗌交，或者好多人會羨慕覺得感情咁好好難得，但我就嫌無咩火花太悶啦。

咁多年嗌交經驗來講，99%發脾氣嘅原因係好無聊同奇怪，當對方問返我做咩發脾氣個陣，都感到唔好意思講出來，所以求其搵個原因帶過就算。

1. 點解你見到我個樣都無琴日咁開心嘅...
由於我地有一間工作室，所以基本上一至五都見，對得多自然鬧得多。記得有一次，我返到去工作室佢個樣好開心眉飛色舞咁講早晨，點知第二日個樣無咁活躍咁講早晨然後我就唔開心，就係咁就發佢脾氣啦哈哈哈哈哈


2. 你摸我個頭但原來都會摸呀媽個頭嘅...
平時佢好中意摸我個頭，每次摸嗰陣都好開心架，但第一次去佢屋企就發覺原來佢都會摸佢呀媽個頭講野架，感到不爽，因為以為自己先係唯一被這樣對待嘅人。
然後我就唔開心，就係咁就發佢脾氣啦哈哈哈哈哈


3. 點解你咁平淡嘅，完全無擔心嘅跡象...
有一次有個朋友話佢12月要去喜馬拉雅山爬山但佢淨係喺香港行過幾個山仔連雪都未見過，所以我就叫佢考慮清楚啦，諗詳細啲喎，然後就問下他嘅意見，佢就咁好平淡咁講
"ok呀，無問題呀，咪去囉""咁如果我又話去呢"
"無問題呀，你咪去"
"點解你咁平淡嘅，完全無擔心嘅跡象..."
"因為你講得話去，一定考慮哂諗好哂所有情況，而且你做啲咩我都支持你嘅"
然後我就唔開心，就係咁就發佢脾氣啦哈哈哈哈哈


4. mario kart㨂錯車...
話說買左部switch返來一齊玩，咁玩mario kart先可以一齊玩。有一次㨂左部電單車好難轉彎，喺火山個關係瘋狂跌左落山，同前面第11名嗰個爭左成半個圈，我平時係頭三名架嘛！突然遭逢巨變實在難以接受，眼見佢又掉我蕉皮又掉我龜殼仲要贏埋第一笑哂口咁
然後我就唔開心，就係咁就發佢脾氣啦哈哈哈哈哈

5. 早訓
佢係一個早訓嘅人，我係一個遲訓嘅人，有時夜晚想一齊wts傾計嗰陣，佢十一點幾就話佢眼訓要訓教，我就會諗係咪人來架，咁早訓，都唔陪我傾計
然後我就唔開心，就係咁就發佢脾氣啦哈哈哈哈哈


6. 同佢啲朋友食西餐
因為我唔中意食西餐（m記唔算）所以每次一齊食野都係食下茶記，米線，一係日本野，有一次佢同班中學豬朋狗友去食晚飯，後來講返原來去左朗豪坊食德國野，仲好有情調好貴，哼又唔見同我食咁有心機
然後我就唔開心，就係咁就發佢脾氣啦哈哈哈哈哈


7. 講理性分析我地一齊大部分時間都係傾計，咩都傾，但多數都係傾一啲社會最近發生嘅事再大家講下意見，但佢好中意講一啲
"不過我又咁睇....."
"但係又........"
"唔係架，因為"
"如果....咁就...."
"有無諗過....."
"我就覺得...."
總之呢，每次都分析反方點解要咁做呀，咁諗呀
總之就好理性咁講講講，令我覺得自己好蠢
然後我就唔開心，就係咁就發佢脾氣啦哈哈哈哈哈
但佢好㩒罵，直到而加都繼續理性分析，話咁樣先可以多方面思考


8. 捉圍棋佢人生最大樂趣除左打programme,數學,就係圍棋啦，我唔中意捉，但要陪佢捉無辦法唯有學來同佢捉。但我完全唔叻，次次如果行左啲喺佢眼中一啲奇怪嘅棋，佢就問
"點解咁行嘅"
即係笑我啦，佢仲要繼續問
"咁你行完呢步，咁你估下我會行邊步？"
直至我自己諗到行落去會死佢先罷休...
雖然佢會幫我回棋，但我都係會唔開心
就係咁就發佢脾氣啦哈哈哈哈哈


9. 佢話可以聰明使用電腦
我地一齊都係用macbook，咁macbook有好多shortcut/手勢
但我用macbook個陣只係用左少少shortcut/手勢，所以成日都會用滑鼠佢每次見到我用電腦做緊啲野嘅時候就會話
"其實可以咁做架，會快好多架"然後開始示範
"唔要呀，要記咁多野"
"你試下啦，好快架"
即係話我蠢啦，然後我就唔開心
就係咁就發佢脾氣啦哈哈哈哈哈
但通常之後都會用佢個方法，因為真係快好多哈


其實仲有好多架，不過要打的話，打到下年都未打完
雖然可能會被人話我係港女，不過唔緊要呀
呢個就係我地嘅相處方式