【泰國物業投資展覽】

泰國物業投資展覽

大樓陳上星期六得閒冇嘢做,就陪朋友去尖沙咀某大酒店裡面搞嘅泰國物業投資展覽行下。 一去到就見到座無虛席,一個細嘅function room坐咗三四十人!搵到個靚位坐低之後, 第一件事當然係去攞嘢食啦!(其實去呢啲物業投資展覽都真係唔錯,有冷氣嘆又有免費嘢食,當然最緊要係增進下投資知識啦!)

講返正題 ,今次展覽會sell嘅樓盤位於曼谷市中心,旁邊有五星級酒店Hilton,步行去 Phrom Phong BTS站約7分鐘。鄰近五星級酒店與大型購物商場,位置非常吸引,我大樓陳之前去泰國都係住呢邊。記得由Phrom Phong站去Central World都只係15分鐘!仲有呢區有好多日本人開嘅日本餐廳,啲嘢食超正!

本來我係嚟食下嘢陪下朋友,但一知道個樓盤location咁靚,都快快脆脆食埋條春卷,即刻揭開本樓書睇下,認真聽下presentation。個樓盤係樓花,2020年收樓,包裝修。一尺約港紙6500蚊。最平嘅單位係一房3百幾尺盛惠港紙二百萬多啲。

同香港比較下,而家二百幾萬只可以去美孚買個車位,喺曼谷市中心買到個小單位其實都算唔錯!聽朋友講,上次佢去咗睇另外一個泰國樓盤,聽完諗多兩諗轉頭嗰幾日已經賣晒。香港人買泰國樓不外乎都係因為相對香港樓平、東協概念同高鐵概念。

其實除咗泰國樓之外,越南、 柬埔寨等樓價何嘗唔係屢創新高? 歸根究底都係因為美國印銀紙,全球熱錢氾濫。最近美國開始加息,一啲新興市場三線國家例如阿根廷、土耳其、委內瑞拉等接連出事,資金外流,貨幣大幅貶值。如果美元因為加息繼續走強,加埋貿易戰影響,呢啲東南亞國家係咪頂得住呢?

我大樓陳幾時都話,投資係要諗真啲。

即刻Follow埋 大樓陳-北上尋樓記

#泰國樓 #投資 #樓市 #物業投資展覽#貿易戰


留言


請按此登錄後留言。未成為會員? 立即註冊
    快捷鍵:←
    快捷鍵:→