【煞停棚改之啟示】

【煞停棚改之啟示】

相信我哋香港人對棚改呢樣東東,都係經過呢一個星期先有較深入了解。都係唔知棚改係啲咩? 點解傳下煞停棚改已經令到啲內房股包括內房3巨魔—— 碧桂園、融創、恆大股價都跌到咁金?

簡單嚟講,棚改就好似我哋香港嘅舊區重建計劃。如果內地政府收地重建舊區,會先清拆舊區樓宇,重建後再安排居民入住。但係近年就變咗現金補償畀啲居民自己去買商品房(即係我哋嘅私樓)。點解要咁做?其中一個原因,係內地三四線城市起得太多樓唔夠需求,所以要去庫存。

不過,好多之前要去庫存嘅三四線城市經過多年後,其實已經由四線變成三線,由三線變成二線。樓價當然亦都係隨著城市發展升咗好多,庫存亦已經無咗好多。今次市場傳話要煞停棚改,其實都係去槓桿政策嘅一部分。啲棚改戶收到補償後,佢筆錢梗係儘量買多幾個單位炒下同收下租,唔會咁蠢淨係買返一個單位自己住啦! 咁樣就令到好多熱錢流入咗個樓市炒賣。 所以煞停棚改,都係去槓桿,希望幫樓市降温嘅調控政策。

短線嚟講,煞停棚改當然會令到內地樓市價格有壓力。但係長遠嚟講,可以減少過量的投資需求, 令到樓市更健康發展。所以我大樓陳話,其實不論對內房股或者內地樓市,長遠嚟講都係一個好消息!

啱啱我哋香港樓市都有新政策-空置稅。不過,對本港樓市都應該係隔靴搔癢,唔會有咩大影響。對於內地見到樓市過熱做嘅調控政策相比,真係小巫見大巫。大家睇下本港地產股同埋內房股調整幅度就知道個分別。所以我大樓陳相信,對於內地樓市阿公有能力令到佢可以平穩發展。但香港樓市呢?靠香港政府?我哋香港人真係要自求多福啦!

即刻Follow埋 大樓陳-北上尋樓記

#樓市 #大灣區 #空置稅 #香港樓市 #內地樓市 #棚改 #舊區重建計劃 #投資

留言


請按此登錄後留言。未成為會員? 立即註冊
    快捷鍵:←
    快捷鍵:→