【真係加息鳥】

【真係加息鳥】

上星期繼中銀、渣打上調H按個鎖息上限到P-2.65%後, 匯豐及其他銀行亦跟隨上調。大樓陳同喺銀行做按揭部嘅朋友傾偈,佢話呢個星期好多人都趕尾班車去申請按揭,希望趕及可以做番個舊plan,搞到佢呢個星期晚晚OT呢!

其實隨著美國進入加息週期,美元同港元息差擴闊,港元持續流出香港,香港加息步只係啱啱開始。H按封頂由2.15%升到2.35%,其實每一百萬貸款每一個月只係供多約一百蚊,看似微不足道。不過,如果你供款年期係25年,一個月多一百蚊, 25年原來就多咗$30000,真係小數怕長計。

美國利率正常化目標為加到三厘息,如果香港限足,以25年貸款期計數,每一百萬貸款,每月供款多$1622。假設買間上車盤600萬 ,借5成--300萬,即係每月供款多$4866,都咪話冇壓力。

如果買樓只係搵銀行做按揭,過到壓力測試(現息率加3厘後, 每月供款都唔超過入息四成),咁應該都冇問題,只係吃力啲。 但係我大樓陳聽過,有唔少人夠膽月入三萬幾四萬,走去買層800幾900萬嘅樓,做9成按揭(當然係用發展商啲「呼吸plan」借),將來加息就大鑊鳥!

其實,香港真係好多人冇清楚計好條數就上車,有啲甚至計錯數畀咗首期跟住上唔到會, 之後蝕咗成百萬訂金都有......不過諗諗下都唔出奇,有人上網識王子,之後王子等錢洗問佢借錢都有人借。發展商借錢畀啲冇能力上會嘅人買樓相對高明得多!

咁多年嚟,騙案同埋歷史都係不斷重複,大家仲記得美國2000年初科網熱潮後,為咗催谷疲弱嘅樓市, 房利美、房貸美開始借錢啲冇還款能力嘅人買樓, 之後造成樓市泡沫後加次按危機嘅故事嗎?

即刻Follow埋大樓陳

#樓市 #加息 #加息週期#按揭#呼吸plan#壓力測試#發展商


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→