【公共年金真係咁著數？】

【公共年金真係咁著數？】

政府推出公共年金，暫時睇嚟市場反應都唔錯 ，未出已經吹到話要由100億加碼到200億。 我大樓陳終極理財目標都係製造被動收入—— 收租 、食息等， 提早退休，享受人生。 雖然我未夠65歲，未有資格申請， 但係都幫家中兩大長老了解下睇下啱唔啱佢哋。

睇完啲資料後 ，我覺得公共年金對啲真係完全唔識投資、完全唔識理財嘅老人家都係一個唔錯嘅選擇。 65歲放100萬落去一個月最多攞番5800蚊。 加埋啲生果金、咩咩津貼同自己有啲私己錢， 過簡單生活 ，好似都唔錯。
不過我大樓陳想強調，「唔錯」係對於一班完全完全完全（太重要，要講三次）唔識理財投資嘅老人家。

公共年金內部回報率四厘，而香港過往十年平均通脹一年大約3%。四厘聽落去都可以抗通脹。 抗到通脹？穩穩陣陣有咩問題？問題係只要願意用少少時間去理財， 回報好輕鬆就可以高過四厘啦。 在美國加息週期剛開始的背景下， 你拎100萬去做港元定期一年都有兩厘幾啦。 隨著美國繼續加息，到2019年做定期都應該已經有有3厘以上！

我假設拎50萬去做定期，另外拎50萬去買啲好穩陣嘅股票，例如啱啱話加電費嘅港燈（現時股價買入就有五厘股息）， 輕輕鬆鬆就可以做到一年有四厘回報。 可能大家會問都係四厘回報，但係買股票有風險喎， 對比公共年金咁樣做有咩好處？
好處有:
1.可以有多啲資金旁身，以應付不時之需， 唔使十年內攞錢剩返七成， 要睇醫生都唔敢攞錢！
2. 電費會因為通脹率調整， 港燈股價/股息亦會從中反映。 如通脹比預期高，亦較有效抗通脹。
3. 政府保證兩電於2018年後15年， 直至2033年， 有8%利潤。 如果你有錢你會去買四厘嘅年金定係做一年保證有8%回報嘅生意?

當然港燈只係我大樓陳求其諗嘅一個例子， 穩陣派息大藍籌其實有唔少。 況且我大樓陳嘅目標唔係過個簡簡單單嘅退休生活，係要過豐盛嘅退休生活。 所以公共年金就一定唔啱我， 穩陣收息股會係我資產嘅其中一部分。 另外，除咗股票 ，一個全面嘅資產配置， 當然要有物業喇。 慨嘆香港樓市太瘋癲，唯有繼續努力北上尋樓，買多兩間作長線投資!
即刻Follow埋大樓陳

#年金#樓市 #大灣區#香港樓市 #內地樓市#投資 #粵港澳　#大藍籌#物業#公共年金#通脹#股票