【飲食】屯門良景街市｜屯門港式茶餐廳推介｜嘉華餐室 精選

今日去良景街市附近嘅港式茶餐廳，名為「嘉華餐室」。餐廳門口位置賣麵包，比較特別嘅麵包有沙嗲牛肉包、奶黃墨西哥包、流心雞尾包、脆皮菠蘿包、芝麻咸豬包等等，臨走果陣都買咗麵包返去畀屋企人試！

茶餐廳感覺幾新派，菜單上有多款菜式，既有一般常餐、港式茶餐，更有川菜、扒餐等；餐廳裝修光猛、空間感大、走廊寬闊，亦有二人及四人座位。 （餐牌在文末）



當日去餐廳大約下午茶時間，就嗌咗特色蝦多士、招牌厚切豬扒包、迷你黑椒神叉香蔥滑蛋、酥皮滑蛋撻，另外嘢飲就揀咗熱奶茶、熱鴛鴦、懷舊紅豆冰。
蝦多士
即叫即炸，香口又香脆；而且炸得夠乾身，無半點油膩感；
蝦多士中間有層芝士，半溶狀態，感覺好正。



豬扒包
豬扒真係厚切無呃人，容易咬開又夠多肉汁，配埋配菜蕃茄一齊食，感覺幾清新；
再配埋懷舊紅豆冰，可以算係完美港式茶餐。





懷舊紅豆冰
好多紅豆蓉同粒粒紅豆，紅豆夠香又有咬口；
而且紅豆冰散發濃濃嘅椰漿香味，口感亦比一般茶餐廳更為奶滑。



迷你黑椒神叉香蔥滑蛋
蛋同叉燒嘅色澤靚，味道幾濃，滑蛋係好夠滑，唔會水汪汪感覺；
叉燒表面有蜜糖咁，好開胃，而且熟度啱啱好，容易咬開又唔韌，感覺仲好食過燒味店；
好似仲有叉燒汁撈飯，好好食！



酥皮滑蛋撻
臨尾叫多個蛋撻試下，望落唔太似酥皮，但食落又幾鬆化；
熱熱地食，蛋香好濃，夠蛋味，抵畀錢！



整體全部食物都幾高質，而且價錢唔貴，好值得去試！

嘉華餐室
地址：屯門田景路31號良景廣場良景街市地下LK1號舖

#屯門美食 #屯門茶餐廳推介 #屯門茶餐廳 #tuenmunfood #屯門美食推介 #屯門美食地圖 #屯門搵食





－－－－－－－－－－－－－－－－－－－－－－－－－－－－－－－－

免責聲明:
是次產品/產品資料是自購的，本文章所發表的全部內容均屬個人意見及感受，並不代表該品牌之言論及立場。如需協助或希望獲得更多有關產品資訊, 請直接聯絡該品牌查詢或和尋求相關專業意見。如從而引起任何損失或法律糾紛，本人概不負責。

希望大家喜歡我中肯的分享

更可到FB及Instagram看我平日分享：
FB Fan page ＆ Instagram ： Szesi Blog
https://www.facebook.com/szesiblog/

Contact Me
歡迎任何合作和試用或出席活動
Email: hoszesi@gmail.com

Fanpiece｜She.com｜Ubeauty｜Blogspot｜Weshare｜Girlab