出走華東Day 2

CP女的碎碎念 於 21/05/2012 發表 收藏文章
酒店自助早餐,同團餐一樣,冇希望就唔會失望。我食咗兩個餐飽仔之後,就已經唔想食落去。

謙謙今日一見到我就講"姐姐morning"。以兩歲人仔嚟講,佢真係叻得好可愛。

因為航班問題,原本第一日嘅行程,延遲到第二日先開始。咁都好,慳返啲又貴又悶嘅自費節目。

填完肚之後,我好興奮咁上咗旅遊巴。西湖,我哋終於見面喇!

喺香港,就算只係天陰陰,我都已經唔想出街,更遑論落雨,但喺我同西湖見面之日,就偏偏落住好悶嘅雨,心情多少都受到影響。

誰不知導遊話,雨中嘅西湖,會靚過晴天嘅西湖;雪中嘅西湖,又會比雨天嘅靚。聽到呢度,我即刻醒一醒,諗起「煙雨江南」四個字,咁就算淋濕身,都係值得嘅。

去到見到人山人海,先醒起今日係星期日。除咗香港嘅旅行團之外,內地其他地方嘅旅行團數目都唔少,加埋當地人,真係想搵個靚位欣賞吓風景都難。

原本以為西湖嘅無障礙設施唔會太好,點知樓梯位都有方便輪椅上落嘅斜台。有個導遊見我埋緊去,就同佢嘅團友講,話呢條係無障礙通道,然後其他人就讓出一條路俾我過,最先行埋一邊嘅仲係一位老人家。調轉香港嘅老人家,真係超過八成都唔會理我。

雨中嘅西湖,真係好靚,莫講話我唔識影相,就算識得影,可能都會無從入手。有人話,靚景,只會留存喺心入面,呢句嘢,係真嘅。

事前諗住起身行兩步上船,點知係要行兩級先上到去,周圍仲要冇扶手。結果,我係俾幾個男性工作人員連人帶車抬上船!坐咗咁耐輪椅,第一次俾人咁抬法,雖然我慳返唔少氣力,但就超唔好意思,因為架車本身都唔輕。

上到船之後,團友叫我哋推去船尾露天嘅地方一齊坐。雖然我無緣見到晴天嘅西湖,但雨天真係會多幾分詩情畫意。無論望邊個方向,都靚到我唔識得形容。見到六和塔,我即刻諗起《新白娘子傳奇》。淨係呢一站,已經令我覺得值回票價。

俾人抬返落船之後,我哋就沿住湖邊行。喺湖中心睇西湖,靚;但湖邊睇亦都唔遜色。一路上都有好多好綠好茂盛嘅樹,好香,吸多幾啖,真係人都健康啲。

下一站就去見識吓龍井問茶。姑身論甚麼雨前明前龍井係咪極品,剩係門口高到要起身行入去嘅梯級,已經令我頭痛發作;點知入房聽講解之前,仲有兩級要上!

正當我準備起身嗰陣,全陪導遊話:「唔好行上行落咁辛苦喇,我同個團友抬你上去啦!」然後謙謙嘅公公就走埋嚟,幾個人一二三咁就抬咗我上去。
個人越舒服,就越覺得唔好意思,所以走嗰陣我都係自己行返落嚟。

我呢啲粗人,唔識欣賞靚茶,不過見到佢嘅「排毒實驗」,又真係好神奇,我仲講笑話唔知返屋企搵綠茶嚟試,會唔會有同樣效果?

聞完茶香,食完比尋晚好少少嘅團餐之後,就到烏鎮水鄉。如果識行識走,呢度真係好多嘢睇 —— 好古色古香嘅一條村落,住客以老人家為主。單單係每家每戶行吓睇吓傾吓,已經可以冇咗一日。

或者我係當時唯一坐住四個轆嘅遊客,所以佢哋都好向我行注目禮。因為每間屋都要檻入去,所以我冇跟大隊入去啲乜館物館參觀,點知領隊又係冇乜興趣,於是佢哋有佢哋行,我同領隊有我哋行去出口等,不過啲路凹凸不平,要推都好辛苦。

一直都聽聞杭菊好靚,好啱我呢類人清吓熱,點知去到桐鄉,唔止周圍都係碎沙碎石,人同車仲多到好似走難咁,逼到水洩不通,烏煙瘴氣。聞說去緊洗手間都會俾人推開你,真係全程最恐怖嘅一站。

由杭州去無鍚,都要個幾鐘車程。呢一站唔單止唔係食得最好,亦係我最辛苦嘅一站。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→