出走華東Day 3

CP女的碎碎念 於 22/05/2012 發表 收藏文章
又係落雨嘅一日。唔通華東真係要落雨先叫靚?

好多去過華東嘅人都話無鍚係全程食得最好嘅一站,但當我見到酒店嘅早餐之後,就知道咩叫做人言不可盡信 —— 就連搵個擺得入口嘅麵包都冇!所謂嘅咖啡,冇奶亦冇咖啡。團友去過好多地方旅行,面對住呢個唔係越食越好嘅局面,深表無奈。

因為全陪導遊係杭州人,所以杭州一站就由佢帶領。而無錫一站嘅導遊,我只可以用一個字去形容 —— 乸!
從來冇見過內地嘅男性白到好似佢咁﹙可能係因為無錫盛產珍珠嘅緣故﹚;上車嘅步態已經扭扭吓;三句唔埋兩句就好似個女人咁手指指,加埋佢獨特嘅腔調,無數次令全車人笑到反肚;又不停話嫁無錫嘅男人最好,因為女人喺無錫地位好高,老公一定會對老婆千依百順諸如此類。之後幾個鐘嘅行程,除非佢唔開聲,否則想唔笑到肚痛都幾難。

「薛家花園」係無錫嘅第一站。如果俾我揀多次,我唔會落車。雖然間屋好大好靚,但唔係度度都有無障礙設施,行幾步就要檻入去 / 上落樓梯,完全跟唔到大隊。好彩有全陪導遊同領隊幫手扶吓搬吓探吓路,如果唔係都唔知點算,但結果我哋都只係行咗好少,就唔想再行落去。

珍珠館係今日第一個購物點。導遊話,香港人成日話大陸嘅嘢假,「每次我都會問返佢哋架,『咁香港有邊樣嘢唔係由大陸入口啊?』真係激死我啊。」然後反吓白眼,又笑死我哋。

每到一個購物點,都有一個「專家」教我哋點分真假、選擇。真又好假又好,見到啲職員冇sell我貴價嘢,而係幾十蚊一條嘅accessories,而且設計又簡單,買返條幫自己轉吓形象 / 做手信都唔太過份掛?

跟住就去參觀紫砂茶壺嘅製作。聞說價錢都唔係好貴,但因為要行樓梯上二樓,所以我冇落車,領隊亦冇跟大隊,陪我喺車度傾偈。好鍾意呢種一對一嘅傾偈模式,因為可以傾得好多,傾得好深入。

食飯之前去咗濕地公園影相。公園真係好細,但我真係好鍾意睇吓山山水水,花花草草,所以都係落車行咗轉。雖然係一條又平又直嘅路,但入口同公園嘅一頭一尾都有一級,而且幾高吓,所以回程嗰陣我決定推住輪椅行返上車。

喺無錫連食飯都辛苦過人 —— 酒樓冇lift,所以要行接近三十級樓梯上二樓!呢幾個月條氣已經一直喘,經此一役之後,我都唔記得自己抖咗幾耐先回到氣。

前一晚食飯前,大家嘅注意力都放晒喺無錫連禮盒裝都有嘅無鍚排骨度,結果無讚亦無彈。點知第二日嘅午餐又有一味無錫排骨,但賣相同味道同前一晚完全唔同。導遊話唔同嘅地方會有唔同嘅無鍚排骨,不過最終大家都覺得呢樣嘢名過其實。

不得不提嘅係,午餐最後一道菜係一條用忌廉唧成嘅龍。上菜嗰陣大家都呆咗,聽到侍應話可以就咁食之後,大家直情嚇咗一跳!為免酒樓會本住用得唔好嘥嘅精神,將條原封不動嘅龍留俾其他客人,臨走前姐妹花決定整爛佢。

下一站係「靈山大佛」。如果俾我再揀一次,我都會選擇唔落車。景點地方大到要坐電瓶車先行得晒。本來係一件好事,奈何部車嘅梯級真係高到我每次都要屈到個膝頭好埋先上、落到車,結果每次我都痛到唔識郁,最後一次直情跣咗落嚟,好彩媽咪同領隊傍住,我先至冇跌落地。雖然「靈山梵宮」仲靚,但我已經冇咁嘅體力行幾十級樓梯上去喇,寧願同領隊喺個亭度傾吓偈。

匆匆忙忙行埋個商場之後,呢個唔出聲都已經令人覺得好好笑嘅導遊就同我哋say good bye,而我哋就向有「東方威尼斯」之稱嘅蘇州出發。

蘇州一站嘅導遊係一位蘇州姑娘。「生在蘇州」真係無錯架,見到佢咁窈窕就知。雖然係咁,佢嘅氣力唔會比男人差 —— 好幾次上落車嗰陣,佢驚我唔夠力,唔單止俾隻手我扶住,仲連個膊頭都借埋俾我!我當然唔敢扶住佢個膊頭啦,自己唔識就力,萬一整親人哋就唔好啦嘛。

「寒山寺」真係周圍都係詩,令我諗起小學上中文堂嘅情景。原來「寒山寺」三個字同祝枝山好有關係 —— 大師同祝枝山好老友,所以就搵佢幫手題呢三個字,點知祝枝山數目分明,題字要收錢,大師唔夠錢俾,所以三個字分開幾次先題好,完全突顯咗祝枝山嘅吝嗇。至於我,全程就只係諗住《金裝四大才子》入面嘅歐陽震華。

「寒山寺」同今日去過嘅其他景點一樣,輪椅唔會路路暢通,所以喺門口俾人抬咗入去之後,我只係喺輪椅行到嘅地方睇吓,要上要落要檻入去嘅,都已經唔想再去。

喺西湖嗰陣,我俾人抬上船;今次上船遊「京杭大運河」,雖然得一級,但嗰級係一個佈滿沙石嘅草叢。船家本來都想抬我上去,好彩我堅決唔肯,除咗因為嗰級太高之外,檻咗上去之後就要踏住碎石行落去先上到船。除咗媽咪要用兩隻手扶住我之外,兩個導遊、領隊同船家都喺隔離傍到實。如果當時落雨,我諗我已經因為太滑而上唔到船,連人帶車抬落去?真係唔敢想像。

話蘇州係「東方威尼斯」,真係唔會過譽 —— 小橋、流水、人家,完全體會得到。我揸住相機,又有一種唔知影邊度好嘅感覺,因為真係靚到我想喊。住喺河嘅兩邊,應該都幾舒服。

好快就上岸喇。見到上岸嘅位係一大片平地,原本我好開心,但可能因為太攰 / 太痛 / 無力,我竟然一隻腳都檻唔到過去。當我諗緊點解救嘅時候,年紀應該唔細嘅船家突然托一托我嘅上身,跟住其他人唔知點樣拉吓扶吓,我就上咗岸喇!雖然事出突然,但呢吓我好感動。

「山塘古街」係一條充滿古代風味嘅商店街,但原來呢度以前係燈紅酒綠嘅地方。紅燈籠加上啡色瓦頂,配埋暮色黃昏,又係另一番嘅美。

導遊推介我哋食生煎包,話皮脆湯甜肉鮮,不過食之前最好咬個窿仔,飲晒入面嘅湯先再食肉同包,因為太大啖啲湯會射晒出嚟,淥親自己又淥親人就唔好。平時我唔太好呢啲包點,但又真係肚餓喇,於是同媽咪買咗半份,一人兩個。我敢講,呢樣係我呢幾日食過最好食嘅嘢!因為之後我哋買多半份,以防團餐唔好食都有嘢填肚。點知夜晚再食嗰陣,雖然包已經凍咗,但皮依然脆;雖然啲湯已經俾舊肉索晒,但依然好好味。第二日同團友講返,佢哋都後悔冇買啲返酒店做宵夜。

「山塘古街」其實好靚,好多嘢睇,好多嘢買,可惜行街之前收到一個電話,直到半夜確定成件事已經處理好之前,我同媽咪都係零心機咁跟住大隊,咩都冇買、冇影。

蘇州一站嘅團餐,可以話係咁多日以嚟最好嘅,起碼每一道菜都入味,有啲又甜甜酸酸咁。咁多餐以嚟,就只有蘇州呢兩餐令我有飽嘅感覺。

如果要我搵一個蘇州站嘅缺點,應該就係當晚住嘅酒店 —— 一入到去就已經聞到一陣唔知咩味;地毯又污糟;電視頻道又少,真係……

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→