越北牛肉粉專門店 (元朗)


放假當然要去食食啦!
去左試新餐廳,天氣開始熱啦!西裝友開始冇咩胃口......
點解有會想試依間餐廳,因為佢個西瓜特飲,用原個迷你西瓜整,感覺好消暑,佢仲有原個菠蘿既特飲,可惜我個肚嗰日有少少唔舒服,所以冇試到,如果唔係我一定叫菠蘿特飲,西裝友就一定叫西瓜,咁我就可以一次試曬兩種口味,但我都係任性叫左黎飲!

西裝友叫左牛肉撈檬,佢比左牛肉比我食,我覺得落得太多鬆肉粉去腌個鮮牛肉,令佢冇曬鮮味,但出奇地佢個調味又便得非常到位,所以唔可以話好食,不過不失!

至於我就叫左生牛肉牛腩湯河,上一檯賣相唔差,略嫌個顏色好似淺色左啲,香味唔太特出,越南湯粉最講究就係個湯底,試佢個湯底就知佢喺龍定喺蟲啦!飲一啖,飲得出係有落材料去煲,但藥材同佐料既香味唔足夠,火喉又差緊啲,個湯底係決定左湯粉好唔好食既先決條件,依方面絕對要改善,, 距離合格仲有一段距離,但值得一讚既就係牛肉上檯嗰陣仲係紅色,用筷子將牛肉浸入湯中整熟,粉嫩色既牛肉好嫩滑,牛腩片亦都係大大片,河粉就一般貨式啦!

檯上仲有三枝特色醬料,我特別鐘意綠色青BB嗰枝,一定要試下!好少地方有傢!
越北牛肉粉專門店 (元朗)
元朗鳳翔路33-43號鳳翔大廈地下1號舖

更多精采內客請㩒:http://www.eatwmacy.com/


留言


請按此登錄後留言。未成為會員? 立即註冊
    快捷鍵:←
    快捷鍵:→