隱世之威靈頓牛柳@森美餐廳


偽ABC去食威靈頓牛柳......
依間森美餐廳係偽ABC西裝友人裇衫袋內收藏既食店之一! 一座低佢就落單叫依個佢一心一意黎食既名菜。
大家都知威靈頓牛柳依個菜式係英國名菜,亦係某英國名廚拿手名菜之一,工序既繁複焗既火候亦控制得十分精準既一道傳統英國名菜,當然我地今次食係迷你牌本,傳統既係一條牛柳咁大條既!

森美餐廳係平民餐廳,威靈頓牛柳通常係高級餐廳先有得食,係香港平民餐廳有得食威靈頓牛柳既已西裝友人所知唔多,依間係期中一間,森美餐廳座位唔多大約得三十個位,環境算唔錯既(走平實街坊路線),係檯同檯之間距離比近,隨時有可能旁邊既食客隨時同你交流(今次就有個姨姨問西裝友人,靚仔你食緊嗰個係咩黎傢,好得意有酥皮既)

碟威靈頓牛柳因製作需時要等15-20分鐘,一上檯我覺得佢既外形好似巨型皮蛋酥,我覺得好攪笑,西裝友人一切開我覺得係熟左啲(因為本小姐對牛扒食得比較生,我可食2-3成熟既),切開一啲誘人既嫩粉色都見唔到,傳統既威靈頓牛柳切開應該係見到令人食慾大增既嫩粉色,但我見到旁邊嗰檯既一碟威靈頓牛柳係生熟程度控制岩岩好,關於控制火候絕對有改善既空間,雖然食落都係嫩滑唔乾,仲係有肉汁留出黎,正唔正宗我唔咁評論,但依間餐廳啲野都算幾好食,可以比多次機會佢下次再試其他野!

我叫既係香煎石班魚柳加黑松露醬,石班魚柳算煎得唔錯,都金金黃黃,不過魚皮煎得唔夠酥脆,上檯唔夠熱,依兩點都要扣分,但尚算中上,石班魚柳屬於新鮮貨,餐廳自己買貨起肉,肉質結實飽滿,但佢既薯菜係平民餐廳黎傢算係非常好,唔屬於求其,雖然唔係啲咩貴價蔬菜,鋪底既椰菜炒得清脆爽口,比多一大碟我都可以食得曬,但佢調味調得非常好用左叼草同少少鹽調味,薯角炸得乾身脆口,可能有啲人會嫌佢乾得滯,我我好鐘意咁乾身脆口,放得耐都唔會淋曬,我將佢全碟既薯菜食清光(依個情況好少發生本小姐唔太鐘意食薯仔)!

平平地又想試下威靈頓牛柳,可以試下依間,做個偽ABC「WELL,一份BEEF WELLINGTON 」唔該~

森美餐廳 Sammi Cafe
荃灣西樓角路170-184號華都中心2樓30-60C舖

更多精采內客請㩒:http://www.eatwmacy.com/


標籤: 威靈頓牛柳  荃灣  西餐  

留言


請按此登錄後留言。未成為會員? 立即註冊
    快捷鍵:←
    快捷鍵:→