【信不信由你】月亮運行影響情緒和工作表現

一年容易又中秋！每逢中秋節，市面上就會推出好多新口味月餅和新款燈籠，簡直就係比自己任食任玩的一大藉口！不過玩還玩，大家千祈唔好唔記得左中秋節的真正主角 – 月亮大神！點解要叫佢做大神？因為八月十五除左係佢最大最圓最光，佢平時都一直暗中控制住人類架！仲唔係傳說中的幕後大boss！
坊間一直流傳存在住人體和月亮之間擁有住神秘而不可割切的關係、月亮支配住人類等的說法，原來係因為人體內有80%是水份，而月球的引力可以好似引起地球上的海洋潮汐一樣，對人體中的水份產生作用，簡稱生物潮。所以每逢月圓月缺月蝕偏月咩月都好，我們人體都會受到不同程度的影響，繼而產生不同的反應。

滿月影響睡眠
瑞典哥德堡大學的一項研究發現，滿月期間，測試者在睡眠中對聲音會特別敏感，又容易發埋啲古靈精怪的夢，仲會平均減少25至50分鐘的睡眠時間！另外，月圓時，人體內所誘發的睡眠荷爾蒙褪黑素的分泌量、體液和興奮精神的電解質亦會隨之產生變化，令人覺得清醒訓唔得冧，咁就唔怪之得每個月都總有幾日番工零捨覺得攰、訓極都唔夠啦！
新月滿月影響情緒
逢親滿月和新月，月亮對人體的影響會比較強烈，導致我地情緒容易變得激動和大情大性，引起人生理和心理的變化，我地可能會無端端大喊大笑、失眠、精神緊張、亢奮等等，甚至作出奇怪的行為！搞到個人做咩都冇心機！咁睇怕以後無論男定女，每個月人人都會有幾日唔方便的日子，會無啦啦冇心情做野、心浮氣躁和無理取鬧。計我話，不如定嗰幾日做赤口，大家唔洗番工番學，咁咪可以避免好多不必要的爭吵囉！做細嘅又唔洗受冤氣嘛！

唔知點解突然之間好想鬧人？好唔想開工？唔一定係因為親戚到或者單純休息唔夠！可能罪魁禍首其實一直就喺你頭上！比大自然掌控的感覺真係奇妙又可怕啊！