放大假前後留意事項

聽日就係Easter假期，好多打工仔都會拎多兩三日假去個短線旅行，但去之前同返黎其實都有好多野要留意！
有啲人好怕自己放大假會增加同事工作量，影響同事甚至係老闆對自己嘅印象，其實只要做好放假前後嘅準備，就唔會怕影響公司運作啦！

放假前唔好大安旨意乜都唔理就走人，應該喺放假之前做好手頭上嘅工作，並向同事交代清楚。而且唔好諗住以即將放假為理由推左原本應該由你負責嘅工作，呢種行為好乞人憎㗎！

放假時，除非公司有好大件事，如果唔係就少理為妙。就算有同事搵你，你都可以禮貌地請佢搵其他同事跟進，如果件事唔急嘅話，可以請佢等你放完假返嚟再處理。工作時工作，遊戲時遊戲，咁先可以發動放假嘅最大效能！
如果係假期間去旅行，最緊要記得買手信！買手信嘅策略最好人人有份，如果買咗份大手信俾你好friend嘅同事，送禮時最好低調啲，廢事比人話你大細超。

祝大家都有個開心復活節假期！