職場新鮮人 你心態ready未？

要做好一份工，資歷同工作態度缺一不可。除咗要有符合工作要求嘅資歷，仲要有隨時調整工作態度嘅心態。有啲人會覺得人際關係嘅處理或溝通能力同你嘅工作能力，就好似天秤嘅兩端，是旦一邊唔平衡都會阻礙職業發展。
尤其係對初入職場嘅新人，如果遇到人際關係嘅唔適合，無論係過於排斥，定係過於迎合，都唔係一種合適嘅應對方式。大家唔好俾「辦公室政治」呢個名稱所嚇倒，所謂「辦公室政治」只不過係有啲人因為利益驅使，過於玩弄人際關係，令人為之色變而已。今次就同大家分享一下職場必需嘅人際關係態度同技巧。

1. 唔好急於表現自己嘅才能同實力
啱啱入職嘅時候，好容易會心急，因為想表現一下自己嘅才能同實力，從而獲得其他人嘅認可，但好容易變成鋒芒畢露、急於求成。咁樣做唔單止會俾人一種自高自大嘅印象，仲會令人覺得你係佢哋嘅競爭對手，引起佢哋防備之心。正所謂「路遙知馬力」，你有實力嘅話總會有一日得到賞識。
2. 保持謙遜，由低做起
初嚟甫到，可能每次分配嘅任務都係擔當一啲小角色，感覺好似唔受重視咁。由企業角度嚟講，為求穩陣，佢哋通常都唔敢將重要嘅任務交俾新人，而係更願意交俾接受過3年以上磨煉嘅員工去做。其實由低做起，係職場嘅第一法則。新人如果能夠保持一顆時刻學習嘅心態，多做少說，唔單止可以由經驗豐富嘅前輩身上學到知識，亦都可以更加容易同新團隊融合。

3. 唔好怕蝕底、唔好斤斤計較
當踏入職場，你需要面對嘅係整個社會，你所代表身份唔再只係你「自己」，你仲係其他人嘅「下屬」、「同事」、「夥伴」，而且代表公司。你亦都係成個社會運作嘅其中重要嘅一部分，因此你其實唔可能將自己孤立起來。所以，對於同事嘅請求，喺唔影響自己嘅工作前提下，建議都係多接受。雖然有時可能會超出你嘅職務範圍，但呢啲都會係好好嘅學習機會，亦都係與同事更熟悉、增進感情嘅好機會。因此記住唔好吝嗇你嘅時間同精力，可以抱住「蝕頭賺尾」嘅心態，今日「蝕」嘅底，隨時令你日後嘅路更易行。