【辦公室健康】8款​越食越肥的辦公室零食

平時番工喺office唔係開會就係覆email、唔係趕文件就係覆客人電話，日復一日，真係唔好話唔悶。打工仔每日最大嘅享受，當然就係食好野，當係慰勞下自己啦！所以，好多人都會儲定好多零食喺office準備隨時醫肚，無聊、肚餓、開OT嗰陣就唔怕冇野食會口痕啦！不過，雖然話就話只係小食，但好多辦公室零食食得多都唔好架！ 每日食一塊餅，都可以食到你肥！
1. 乳酪
乳酪有利腸胃健康，又有低脂口味，簡直就係女士們的恩物！不過大家都係唔好咁高興住！其實市面上好多乳酪都加入左人工甜味劑，所以先會咁甜咁好味。每日一杯，可能唔止幫助唔到消化，分分鐘仲食到你大肚腩添啊！

2. Energy bar
人稱energy bar嘅穀物燕麥條，有齊人類每日所需嘅營養，飽肚之餘，仲好似好健康。不過裡面加加埋埋咁多油炸堅果和糖份，每日食一條真係唔方唔肥喇！而家市面上仲出左好多甜到死嘅朱古力味同綿花糖味，真係諗起都肥啊！大家都係唔好比佢呃左喇！

3. 果仁果仁含有豐富的氨基酸、礦物質和維生素，有利心血管健康，又可以抗氧化，但堅果的脂肪量和卡路里同樣唔可以睇小！所以花生、腰果、杏仁、榛子等果仁都係少食為妙。

4. 果乾
唔好以為果乾都係生果嘅一種就可以放心咁食，提子乾、藍莓乾、桃乾、芒果乾等等始終都係加工食品，糖份高，食得多都係冇益架！

5. Cereal
Cereal口味多、飽肚，細細盒沖牛奶食夠曬方便，而家仲有好多標明係低脂、全穀嘅cereal，做辦公室小食簡直一流！事實上，cereal之所以咁好味，都係因為加左好多糖同精煉嘅碳水化合物，而呢兩樣成份，都係致肥嘅主要原因，大家都係唔好成太多啦！

6. 全麥麵包 / 紙包蛋糕 / 餡料麵包 以為食麵包同蛋糕就一定健康過食薯片？唔好咁天真啦！大部份喺市面上買到嘅麵包，即使係全麥，都好大機會係由加工的穀物所製成，其會令血糖提升 ; 紙包蛋糕聽落都好似好健康，其實都好高糖份，不宜多吃 ; 而麵包舖賣嘅有餡麵包就更加冇益！好多款麵包唔係加大量牛油同芝士，就係落朱古力同人工調味，一日一個，包你一個月內變肥婆！

7. 無糖汽水
想飲可樂但又想減肥？飲diet coke或者zero咪得囉！咁諗你就錯喇！冇加糖啲汽水點會仲咁好味啊？標榜無糖、零卡路里，其實都係加左人造甜味劑姐！同飲普通汽水根本冇咩大分別！有牙醫仲話飲zero蛀牙仲快過你飲原味可樂添啊！

8. 天然果汁
唔飲汽水，飲果汁得喇掛？唔講喺超市買到嘅人造果汁，就算係用果汁機鮮榨出嚟嘅天然果汁，都未必好似你想像中咁健康有益。全因係榨汁嘅過程中，生果大部份嘅纖維已經受到破壞，飲左只會吸收到大量果糖而非生果實質的營養。所以，想健康 ? 不如就咁食個生果仲好啦！
我都明各位打工仔番工辛苦，做到悶，口痕想食啲零食都好正常，但上班一族平時已經少運動，身體再吸收咁多高鹽、高油、高糖嘅零食，真係會越食越肥。所以，食乜野辦公室零食都應該要以健康行頭，水果、茶一定係不二之選！當然，間唔中放肆下都冇咩唔好嘅，不過食多左就要做番運動、夜晚食少啲平衡番喇！